PABIEN NA NOS HENDE MUHERNAN RIBA DIA INTERNATIONAL DI HENDE MUHER

PARLAMENTARIA CLARISCA VELASQUEZ TA FELICITA NOS HENDE MUHERNAN

Dia international di hende muher ta wordu celebra tur anja riba 8 di maart. E ta un dia di mayor celebracion global riba tereno economico,politico y logronan social di e hende muher. Ela cuminsa como un evento politico social cu a transforma den cultura di hopi pais como un dia special pa duna reconocimento y balor na e hende muher y tambe un dia pa e hende homber expresa amor pa e hende muhernan rond di nan. Di otro banda e politica y derechonan humano designa pa nacionnan uni ta fuerte! Politicamente y concientisacion social y e struggle di hende muher pa nan derecho mundialmente ta bin dilanti y ta wordu examina den un forma di speransa! Na ocasion di dia international di nos hende muher nos ta pone atencion na e trabaonan cu hende muhernan a desplega pa wordu reconosi y balora! Hende muhernan hopi biaha ta wordu expone na violacion den tur sorto di forma verbal,sexual, discriminacion y intimidacion. Hopi ta wordu confronta cu bida su so cu su jiunan, pobreza y ta wordu exclui socialmente pesey mes a bin despues di hopi sacrificionan leynan international y national specificamente pa proteha nos hende muhernan den nos sociedad. Pesey mes den cuadro di e dia special aki mi kier a duna nos hende muhernan un pabien cu awe nos por celebra e dia aki despues di decadanan di lucha pa nos derechonan door di nos antepasadonan cu balentemente a lucha. Cu awe nos por studia y educa nos mes pa bai dilanti profesionalmente pa nos por duna nos jiunan e ehempel y guia cu nan mester pa nan por sigi den bida majan. Cu nos por ta ehempel y inspiracion pa e hende muher ey fo cu ainda no tin e curashi pa lanta para pa su derechonan. Cu e no mester tin miedo di dal e stap ey pa sali di e bida cu ta laga e y su jiunan sufri. Cu tin speransa pe! cu no pensa cu e no lo logra! tin oportunidad ey fo pa tur! Lanta para y bisa no mas y pensa riba bo mes prome! Na e mamanan soltera mi kier dunanan aliento pa sigi lucha pa bai dilanti. cu estudio bo lo logra saca abo y bo jiunan dilanti. Cu bida ta sigi y haci bon uso di e oportunidad pa educa bo mes! Na nos mamanan y welanan nos kier gradicinan y bisanan danki cu nan a duna nos e criansa y educacion cu awe nos por ta den funcionan importante den comunidad contribuyendo asina na un mihor Aruba. Cu nos los sali na vanguardia di e hende muher den nos comunidad! Na Dios tata poderoso nos kier gradici pa duna nos hende muhernan bida y salud pa nan por sigi lucha pa nos hende muher wordu reconosi y balora tur dia! Pabien na tur nos hende muhernan y nos ta sigi cu e lucha!