Actuacion rapido di algun mirones a yuda salba bida di motociclista herida den accidente di trafico diamars mainta

Diamars den oranan tempran di mainta, Polis y ambulance a haya informacion di un accidente serio entre bromer cu auto. Esaki a sosode na altura di Hooiberg Store.

Na yegada di Polis ya ambulance tabata n’e sitio tratando e motociclista herida y su yiu.

E accidente a sosode momento cu un tata tabata transportando su yiu riba bromer. Den un trafico druk di mainta e lo tabata pasando e fila di auto.

Un poco mas dilanti un auto a stop pa duna un auto panort di caminda chance pa subi caminda pa bay direccion pariba.

Aki ta unda e tata lo no a pone atencion y a dal contra e auto heridando su mes seriamente, mientras su yiu a kima su pia n’e muffler cayente.

Durante e accidente e motociclista a corta un ader mayor parti paden di su pia y a cuminsa sangra profusamente.

Na yegada di Paramediconan, e homber tabata den un situacion hopi serio, debi cu el a perde masha hopi sanger mes.

Loke a scapa bida di e homber tabata actuacion rapido di algun mirones. Nan a actua mesora dor di a mara of pone presion riba e herida serio cu e motociclista a ricibi. Di e manera ey minimalisa e sagramento.

Un  reconocimento publico n’e personanan cu drenta den accion mesora pa minimalisa e perdemento di sanger te ora cu Paramediconan a yega y tuma over, scapando bida di e motociclista. Tur esnan herida a wordo transporta pa Hospital.