Casonan di abuso sexual ta aumentando mientras gobierno ta na soño

Segun drs. Mervin Wyatt-Ras, mientras casonan di abuso sexual di menor y maltrato ta aumentando, gobierno ta na soño. Wyatt-Ras ta menciona tur e headlines den prensa, entre otro:

“David Perez Tejada y Vanessa Vrolijk ta esnan deteni pa abuso sexual di nan yiunan”, “Corte a condena Jaime Trimon na 5 aña di prison pa abuso sexual cu muchanan”, “Pastoor Doedel Sofia a haya servicio comunitario”, “A encarcela Jason Margarita pa abuso sexual cu mucha” y “Rudi Carti interoga atrobe”. Aki ta menciona djies un par. E consecuencianan di abuso sexual (di menor) ta devastador pa e victima. Den 80-90% di e casonan ta trata di persona serca di e mucha/persona, den famia of amistad. Pues un persona di confiansa. Pesey e daño ta hopi grandi pa e victima. Ora ta trata un mucha, abuso sexual ta touch cu integridad di e mucha. Un persona cu e ta confia ta haci’e daño y e ora e no por confia. E daño ta pa henter bida.

E menor victima di abuso sexual por desaroya, miedo, ansha, angustia, inseguridad, desconfiansa, rabia y odio. E por cambia diripente di comportacion of haya “nachtmerrie” of cuminsa haci daño na su curpa. Aki por bisa e imagen propio di e victima ta ser afecta. Ademas ora e bira mas grandi e por cuminsa automutila pa alivia su dolor, disocia y desaroya depresividad y hasta por ta bipolar y haya otro problemanan di indole psycho-social. E trauma di termino duradero. Den tur fase di bida lo por haya cierto complicasion. Importante banda di preveni ta pa ora haya sa cu esnan rond di e mucha por duna oido y sali na su defensa. E exito di terapia tin di haber cu con ta trata e menor y sosten di su sernan keri. Pa loke ta trata castigo esakinan te ainda abou en comparacion cu e daño cu e victima ta ricibi. Wyatt-Ras ta lamenta cu e minister di Asuntonan Social ta keto den tur e casonan aki. E minister presidente cu a priminti di bin cu ley di 5 minuut tambe a faya barbaramente. Castigo di e abusador tambe ta laga di desea, cu no ta suficiente. Hasta ta duna “community service” na personanan abusado cu mester keda leu di hende.

Wyatt-Ras a manda pregunta pa minister di Asuntonan Social encuanto tres hoben sospechoso y ni musca no a bula, corda pa e contesta e parlamentario. Wyatt-Ras no ta haya cu esaki por.

E minister ta bin Parlamento si pa bin aproba un suma pa e por financia Crisisplan. Gobierno y e minister di Asuntonan a declara un crisis social ora  mucha a ser abusa dor di nan mayornan cu consecuencia fatal sinembargo no a cumpli cu loke a presenta na Parlamento.  Mientras cu AVP den su gobernacon a enfoca riba prevencion a base di recomendacionnan di entre otro UNICEF, den e gobierno aki a priminti di inverti den ayudo. A nombra casi 50 of mas persona como contractant mientras den combersacion cu instancianan, varios a indica di ta prefera un trahado fiho. E impresion ta cu e contractanten no por anda cu e casonan (dificil) di cual kier baha e wachtlijst. Dicho wachtlijst no a baha manera a priminti. Segun Wyatt-Ras el a adverti esaki durante reunionnan sinembargo no tabatin oido pa esaki.

Un djies ora bin trata presupuesto lo bolbe pidi placa, mientras gobierno no ta acepta cu parlamento ta critico. Wyatt-Ras ta lamenta cu su preguntanan haci na minister di Asuntonan Social, Glenbert Croes dia 19 di januari no a ser contesta te dia di awe. Esaki no ta un forma di trata Parlamento cu ta representa nos pueblo y ta controla con placa di pueblo ta ser gasta. Minister: No ta Mervin Wyatt-Ras bo no ta contesta, sino pueblo di Aruba bo ta keda sin contesta. Esaki ta refleha e arogancia di minister cu ta na soño. Un djies e minister ta bin si parlamento pa nos sigui sostene su plannan, anto nos mester djies keda keto y sostene?

Mescos ta pasa cu esnan di fase. Ta ser tresi dilanti cu lo stop fase, pero tin persona te ainda no a haya ningun cent di fase y a ser manda di cashi pa muraya. Nan ta aserca parlamentario y no tin ningun parti pa referi nan pa nan haya oido.

Por bisa cu pa loke ta trata maltrato tambe e cantidad di casonan ta halto y bo no ta tende di e minister. Por menciona ehempel di titulo di articulonan cu ta refleha maltrato den nos pais. Tur ta ehempel di februari di e anja aki: “Polis a detene homber cu a dal su mama”, “Homber cu ta menasa famia deteni na Zumbo”, “Homber a bati muhe na Canashito”, “Caso serio a agredi y menasa cu morto”, “Polis a intermedia den problema entre mama y yiu”, “A cuminsa dushi pero cos a caba bon zuur na apartamento di placer”, “Dentenemi pa maltrata X-pareha”, “Polis a intervene den pelea di pareha riba caya”, “Polis a bai atende caso bringamento na Jan Flemming”, “Ni maske cuanto bo rabia, respet mester keda”, “Problema familiar a finalisa cu aresto”, “Ex a bin pa busca problema na Macuarima”, “Flecha di cupido a faya: Amor a caba den Juan Jacobstraat”, “Mama y yiu deteni den caso di maltrato na Savaneta”, “Homber deteni pa maltrato na Esmeralda 27” y “Polis a intermedia den caso di maltrato”. E consequencianan di maltrato pa famianan tambe ta grandi, pero mientrastanto den e casonan aki tambe e Minister ta na soño.