Comunicacion ta clave pa un poblacion bon informa

Gabinete-Wever Croes lo sigui enfoca riba comunicacion structural entre Gobierno y pueblo

For di inicio di Gobernacion, Gabinete Wever-Croes a stipula cu lo hiba un maneho caminda cu ta pone e ser humano como punto central di desaroyo.

A compromete cu lo haci esaki aplicando entre otro transparencia den transmiti informacion corecto na pueblo. Gabinete Wever-Croes ta keda pone enfasis riba e aspecto di comunicacion.

Principalmente pa informacion corecto ta acesibel na tur ciudadano. Esaki sigur a hunga un rol sumamente importante durante 2020 teniendo na cuenta tur e cambionan cu Covid-19 a trece cu ne.

Na 2019 a traha riba fortificacion y sostenibilidad di Departamento Bureau Voorlichting (BUVO). BUVO ta maneha e presupuesto di media y ta encarga cu e publicacion di informacion den medionan di comunicacion.

Aña 2020 tabata un aña cu a mustra con importante e pagina di Facebook di Gabinete Wever-Croes tabata pa percura pa facilita e proceso di comunicacion di informacion tocante entre otro Covid, den forma mas directo cu usuarionan di e plataforma.

Un otro forma cu Gabinete Wever-Croes a percura pa keda mantene pueblo informa ta a traves di e corant digital “IslaOnline” cu ta publica di dialuna pa diabiera y ta contene informacion di trabounan di cada Ministerio.

“Por mira un aña 2020 caminda cu hopi enfasis a bay riba comunicacion, maneho di crisis y mitiga calamidad. Gabinete Wever – Croes y diferente departamento y profesionalnan a traha duro pa atende cu e crisis relaciona cu Covid, maneho di capacidad di cuido, crisis social, y crisis di migrantenan di Venezuela cu tambe a bin cu diferente consecuencia. Comunicacion ta clave pa un poblacion bon informa, y na 2021 Gabinete-Wever Croes lo sigui enfoca riba comunicacion structural entre Gobierno di Aruba y pueblo”, Prome Minister Evelyn Wever-Croes a acentua.