WILLEMSTAD – Ayera mainta Ministerio Publiko na Kòrsou a informá ku 8 dia pasá, 24 di februari ultimo, riba petishon di Ministerio Públiko di Hustisia Hulandes a detené e sospechoso J.K. di 36 aña di edat na Hulanda den e investigashon Themis. E kaso ‘Hato Airport Shooting’.
Ta sospechá J.K. di tabata envolví den un tiroteo konosí na Kòrsou komo e “Hato shooting”.
Dia 15 di yüli 2014 a asesiná dos persona na Aeropuerto Internashonal di Kòrsou ku arma di kandela outomátiko.
Shete hende presente entre kualnan pasahereonan i turista inosente na aeropuerto a keda herida durante un atentado teribel i sangriento.
Anteriormente a detené 5 persona den e kaso aki. E dos tiradónan a keda kondená na kastigu di prisòn di bida largu.
E otro tres sospechosonan a keda kondená na kastigunan di 12, 14 i 24 aña. E kargo kontra J.K. ta di tabata envolví den e asesinatonan. Mirando ku J.K. tabata biba na Hulanda, Ministerio Públiko Kòrsou a hasi petishon na Hulanda via di órden di Hues-Comisario di Kòrsou pa su detenshon i traslado pa Kòrsou.
Entretantu a trasladá J.K. pa Kòrsou i e siman aki e lo presentá dilanti Hues-Komisario. ‘Themis’ ta un investigashon di echonan kometé den diferente pais den Reino Hulandes i otro pais pafó di esaki.
Speshal p’e investigashon aki a forma un tim di reshèrshi ku ta konsistí di miembro di kuerponan polisial di Sint Maarten, Kòrsou, Aruba i tambe e Tim di Koperashon di Reshèrshi (RST).
E tim aki ta kai bou di mando di Ministerio Públiko di Sint Maarten i Ministerio Públiko di Kòrsou. Anteriormente den e investigashon aki tabata tin detenshon na Kòrsou na luna di novèmber2020 i febrüari 2021.
BIDA LARGO
Dia 18 di yuni 2015 Corte a kondena dos dje pistoleronan kaba pa dòbel asesinato pa kual nan a haña kastigu di bida largu.
E hombernan aki a konspirá pa mata Erwin ‘Djais’ Juliana dia 15 di yuli 2014 na aeropuerto Hato. Esei a kulminá den e masakre di dos gèng na Hato.
Durante tratamentu di e kaso nan no a demostrá duele pa loke nan a hasi ni a pidi pordon. Den e kaso aki tambe tabatin un Polis enolvi kende a kobra 30.000 florin pa pasa informashon pa e kriminalnan. E akusadonan den e kaso aki tabadta Adrian M., Raily B., Renaldo M., Givency M., Judrin M., i Adrian M.
