Regsitracion pa participa n’e destaho di cultivacion y procesamento di cannabis medicinal a sera

Minister di Salubridad Publico, sr. Dangui Oduber ta informa cu e registracion pa participa n’e “Request For Proposal” (RFP) nan a termina dia 26 di februari 2021 ultimo. Tabatin gran interes demostra den e parti di cultivacion y procesamento di cannabis pa uzo medicinal na Aruba.

E proceso pa pais Aruba conoce un pilar economico nobo ta canando segun plan. E industria di cannabis medicinal na Aruba lo por genera 100 miyon florin na entrada. E lo por crea 200 cupo di trabou y e salario averahe di e trabounan aki lo ta entre 3600 pa 4000 florin bruto.

Di e 100 miyon florin cu e industria aki lo por genera 12 miyon florin ta bay den caha di Gobierno atrabes di e impuestonan y prima, asina Minister Oduber a trece dilanti.

Tin 3 sorto di RFP cu e aplicantenan por participa pe: 1. ​RFP p’e cultivacion di cannabis pa proposito medicinal na Aruba, p’esaki 17 compania a registra pa participa den e proceso. 2.​ RFP p’e procesamento di cannabis pa proposito medicinal na Aruba, p’esaki 12 compania a registra pa participa den e proceso. 3. ​RFP p’e cultivacion y procesamento di cannabis pa proposito medicinal na Aruba, p’esaki 44 compania a registra pa participa den e proceso.

Den e sigiente paso e companianan cu ta registra lo ricibi documentonan cu instruccion p’asina prepara nan proposicion. Solamente companianan cu a registra durante e periodo di registracion lo por sigui den e proceso di RFP. Minister Dangui Oduber ta gradici tur compania cu a mustra nan interes den parti di cultivacion y procesamento di cannabis pa uzo medicinal na Aruba.

Un pensamento progresivo pa diversifica nos economia cu industrianan nobo pa futuro ta loke Aruba mestrer di dje asina Minister Oduber a termina bisando.