Accidente cu dos persona herida y hopi daño material na Pos Chiquito

Diaranson algo despues di 9’or di mainta, a sosode un accidente basta fuerte entre un Nissan March y un Kia Rio. Mesora a pidi pa presencia di Polis y ambulance. Mesora Polis di Trafico a yega n’e sitio y a sera e caminda p’asina cuminsa cu e investigacionnan necesario.

Polis a tuma tur dato y a bin compronde cu Nissan March tabata biniendo for di pariba y a bay lora na su man robes, net na momento cu el a bay lora, e Kia Rio cu tabata biniendo su tras no a regula su velocidad na tempo y a dal tras di e Nissan March.

E impacto tabata asina fuerte cu e Nissan March a dal contra un cura di cas y e dos persona den e March a keda herida. Un di e heridonan tabata keha di hopi dolor na su lomba.

Dos ambulance a presenta n’e sitio p’asina duna asistencia medico y despues a dicidi pa transporta nan pa hospital pa un control medico mas avansa. Ambos auto a haya hopi daño material.