Aruba Bank a uni cu Fundacion Movemento ta Bida y Setar pa den e proyecto “Hunto grandi, grandi hunto” dedica specialmente na nos 60+.
E meta di e proyecto ta pa informa y educa e comunidad 60+ ariba diferente tema importante cu tin di haber cu servicionan bancario y e solucionnan cu inovacion ta ofrece awendia pa tur cliente di banco. Cu e pandemia mundial, ta bira mas importante cu nunca pa tur cliente, tin aceso na nan cuentanan bancario for di na unda cu nan ta y ki ora cu ta, na un manera facil y sigur.
E charla ofreci pa Aruba Bank diamars mainta, a enfoca riba kico tur ta encera online banking, y con e grupo di 60+ por haci uzo di dje. A splica cu Aruba Bank ta ofrece asistencia personalisa na tur sucursal p’e comunidad di 60+ n’e Digital Lounges di banco.
A splica tur esnan presente tambe con pa proteha nan cuenta bancario di Aruba Bank. E sesion informativo tabata uno hopi interactivo entre expertonan y e publico.
Representantenan di Aruba Bank tabata presente despues di e charla pa por a duna asistencia na cada miembro cu tabata desea di ricibi mas informacion riba e topiconan menciona of cualkier otro topico.
Pa mas informacion tocante servicionan digital y asistencia personalisa na cliente por yama 527-7777 of bishita www.arubababnk.com.
