Celebracion di comunidad di LGBT pa cambio di ley di Codigo Civil no a “make sense”

Dialuna ultimo, Parlamento di Aruba a trata e cambionan den e Codigo Civil caminda un di e cambionan mas comenta y discuti pa algun aña caba, tabata e asina yama “geregistreerd partnerschap.”

Un punto cu sin duda ta di vital importancia pa hopi hende cu ta den un relacion pa hopi tempo c’un persona, sin cu nan a drenta enlace matrimonial y cu na momento c’un di e partnernan aki fayece of dicidi di kibra e relacion, un di nan ta sali hopi perhudica.

Tur locual cu nan a spar hunto, a construi hunto, cu cumpra hunto, un di nan lo perde si e cosnan aki no tabata riba nan nomber y den comunidad pa hopi añanan caba, ta conoci casonan asina.

Casonan tristo caminda e partner cu keda na bida, tabata wordo someti na abusonan di famia di e fayecido, kendenan tabata exigi p’e persona entrega tur pertenencia ya cu ta nan ta famia y ta nan so tin derecho legal awor riba e propiedadnan aki.

Den hopi di e casonan aki, tabata tristo pa mira con sea e muher of e homber cu keda na bida, tabata wordo presiona y acosa p’e entrega tur propiedad n’e famia cu pa colmo ta haya rason tambe di Corte ya cu tur cos  ta registra riba nomber di e difunto loke ta haci e famia heredero di tur e propiedad y placa cu lo por tin gespaar na banco.

Mesun situacion ta surgi ora c’un pareha cu no a casa nunca y despues di hopi aña nan bay for di otro, un di nan ta sali perhudica ya cu nunca a tabata existi un ley caminda ambos ta haya reconocimento pa loke nan a crea y construi hunto.

Awor cu e cambio y introduccion di e “geregistreerd partnerschap” ambos persona den un tipo di relacionnan asina, ta proteha pa ley y nan lo no por wordo acosa y persigui caminda nan ta perde cosnan cu nan a traha asina duro pa haya.

Awor cu e cambio di ley aki tur e hendenan aki, cu no ta casa, pero ta biba manera ta conoci como concubina of cualkier otro situacion, ta carga mesun derecho den e relacion aki y si tin yiunan envolvi, nan lo ta e herederonan di loke e pareha aki a crea y construi.

E cambio aki tambe ta permiti cu parehanan di mesun sexo, sea dos dama of dos homber cu ta bibando hunto, tambe por construi propiedad, por cumpra cosnan hunto y ora cu e relacion termina of un di nan fayece, e partner di mesun sexo, ta wordo reconoci como heredero di tur e propiedad.

E unico aspecto oficial di esaki, ta cu e dos personanan aki di mesun sexo, bibando hunto lo por registra nan mes como pareha oficial den Registro Civil y ambos ta haya mas derecho pa tuma decisionnan como partner reconoci di otro. Un grupo di LGBT dialuna atardi  a organisa un celebracion cortico ya cu e alegria tabata grandi cu porfin un relacion di personanan di mesun sexo lo wordo registra oficialmente, apesar cu esaki no te mesun cos cu reconoci un acta matrimonial di e hendenan aki.