Director suplente di Corsou sin diploma apropia cu 10 mil florin pa luna si tin placa

Na meteo Aruba tin un abuso tumando lugar di marca mayor, caminda Gabinete Wever Croes ta bolbe confirma cu e grito di ‘e hende ta central,’ ta un grito falso y sin contentido.

Aruba tin un yiu di tera den persona di dr. Marck Oduber, kende a sigui su preparacon universitario den meteo y recientemente a gradua cono dokter riba e tereno aki pero cu no ta haya reconocimento cerca gobierno di Aruba.

Ta for di 2018 despues di un confrontacion di un sindicalista a wordo manda suspendi pa dos siman ora cu el a wordo manda cas, loke despues Corte di Husticia a mustra cu ta un suspension ilegal y pa no sigui decision di Corte aparentemente, a dicidi di manda sr. Oduber na disposicion di Minister di Enseñansa pa atende asunto di UNESCO.

Na varios ocasion e yiu di tera aki, un Arubiano bon studia y bon prepara, a trata di bay bek pa su posicion como Director di Meteorologische Dienst, pero cu te dia di awe e peticion di e profesional Arubiano aki, a wordo neglisha.

Pa completa obra di e decision incorecto di  Minister di Telecomunicacion, Chris Romero, a bay over na apunta Dave Barkmeyer como director suplente, kende pa colmo ta un pensionado cu tabata traha na Corsou anto kende tin un preparacion di MBO cu ta leu for di e estudio y preparacion di dr Marck Oduber di Aruba.

E funcionario aki ta cobrando e suma di 10 mil florin pa luna anto ta mesun Gabinete Wever Croes aki cu ta bou presion di Hulanda pa baha gasto di personal di e aparato gubernamental, ta haci e cosnan aki.

Gobierno di Aruba ta den un discusion continuo cu trahadornan publico y nan sindicatonan riba entrega di parti di nan salario como ayudo pa yuda esnan cu a perde nan trabao den sector priva, pero aki ta zwaai cu placa di pueblo sin cu ta necesario, siendo cu tin un yiu di tera mucho mas mihor prepara y mucho mas profesional cu e actual Director suplente cu ta dirigiendo e servicio di Meteo di Aruba.

Ta algo tristo, pero AWEMainta tin informacion cu pa emplea e persona aki den e puesto aki, e mesun Gobierno cu tin cu duna cuenta na CFT riba gastonan di personal, a haci cierto maniobra p’e nombramento aki scapa di control di e Comision di  Supervision Financiero cu ta controla maneho di Gobierno.

Aki tin cu mustra cu dr Marck Oduber tin un preparacion di doctor philosophiae (PhD) den geosciences na Universidad di Maastricht, un preparacion den geosciences di Master of Science (MSc) na Universidad di Mississippi State University y a logra su Bachelor of Science (BSc) riba tereno di Meteorologie/Geosciences na Universidad di Oklahoma.  

Na Universidad di Mississippi, Marck Oduber a logra bira e mihor studiante estranhero p’e specialidad di  Master of Science cual sin duda ta confirma su bon preparacion cu e tin p’e funcion di Director di Meteo na Aruba.

Pero awor ta mustra cu envolvimento di otronan, envolvimento di Minister Romero, ta pone cu e profesional Arubiano aki no mag di eherce su funcion pa cosnan cu ta mustra mas tanto riba asuntonan politico, esta nepotismo.

Tur problema pa dr Marck Oduber a inicia ora cu el a inicia un investigacion contra di un trahador di Meteo, kende despues a bin resulta di ta miembro di un famia di un consehero di Minister di Transporte, Chris Romero.

Dr. Oduber a wordo poni ter beschikking di Minister Rudy Lampe, supuestamente pa atende asuntonan di UNESCO, pero caminda en realidad e tabata un decision pa kita su persona for di caminda y asina no sigui cu e investigacion cu el a inicia.

Na varios ocasion sr. Oduber a manda carta cu e kier bay bek pa su posicion di Director di Meteo Aruba, pero te dia di awe, aparentemente e no a ricibi reaccion ni di Minister Chris Romero y tampoco di Prome Minister Evelyn Wever Croes.

Minister Romero cu aparente aprobacion di Conseho di Minister, lo a dicidi di nombra sr. Barkmeyer como Director suplente, kende a baha como pensionado cu tabata den servicio di Meteo Corsou y c’un salario di 10 mil florin pa luna, ekivalente 120 mil florin pa aña. P’e tipo di weganan politico aki si Gobierno tin placa, pero otro funcionarionan publico tin cu entrega miles di florin, trahadornan di companianan estatal tambe tin cu sacrifica, pero Gobierno ta sigui hunga e tipo di weganan aki cu nombramentonan cuestionabel cu ta sigui tuma lugar practicamente tur dia. Tur cos ta comproba cu Marck Oduber no ta CENTRAL p’e Gobierno aki.