Editorial: Casonan di abuso contra mucha aumentando y mester ta advertencia serio pa mayornan

Mihor proteccion contra abuso sexual ta mas atencion y proteccion di mayornan. Den un periodo di menos di 10 dia, autoridadnan a haya nan mes confronta cu tres denuncia di inmoralidad cometi contra criaturanan menor di edad, loke sin duda ta hopi alarmante y di hopi preocupacion.

E casonan ta varia si pa loke ta edad di e victimanan ya cu tin dos caso den cual muchanan hopi chikito lo ta envolvi y tin otro caso caminda e muchanan ta di un edad un tiki mas grandi, pero ainda menornan di edad sin duda.

Den tur e tristeza p’e tipo di casonan aki, ta mirando si un lus positivo, esta cu mas y mas e muchanan y nan famia pa dicidi di bin dilanti y denuncia e casonan di inmoralidad aki, contra di hendenan mayor di edad cu mester por sa mihor cu ta trata di menornan di edad.

Ya caba tin e caso conoci di  un ex coordinador di un ex-Minister, kende no solamente a filma hobennan menor di edad hacienda ehercicio, pero tambe lo ta meti den relacion cu menornan di edad, pero ainda no por bisa cu siguransa ya cu e investigacion ainda ta andando.

Den e otro dos casonan tin uno caminda Cuerpo Policial mes a informa den fin di siman di detencion di un homber di 25 aña sospecha di abuso sexual c’un menor di edad caminda no a specifica edad di e criatura, mientras cu diamars anochi tin otro caso di un tanta cu a yama Polis pa un homber, kende lo a mishi cu su sobrina di 12 aña, pero no ta conoci ainda si Polisnan a bay over na detencion di e persona aki.

Te cu ayera nochi ainda autoridadnan policial no a informa di detencion den e caso aki, pero ta mas cu claro cu investigacion a inicia y cual lo por conduci na detencion di e persona en cuestion.

Actonan di inmoralidad y abuso sexual ta prohibi totalmente na tur momento y e lucha aki tin cu sigui dilanti, caminda comunidad henter tin cu sostene e lucha aki p’asina logra un mihor proteccion di tur mucha menor di edad.

Ya caba ta conoci cu den caso di e ex coordinador, su detencion a wordo prolonga pa motibo di e investigacion tumando lugar, pero den e otro dos casonan ainda no tin mucho informacion concreto, pero si cu Polisnan a participa cu a detene un homber di 25 aña diasabra ultimo.

Un aspecto yamativo den e casonan aki, ta esun cu a tuma lugar na Savaneta, caminda tanta di un criatura di 12 aña, a bay na un negoshi na Savaneta y eynan a yama Polis p’asina denuncia un trahador di e negoshi pa a mishi cu su sobrina di 12 aña.

Segun declaracion di e tanta, e mucha a conta su persona cu su padrastro, esta e esposo di e ruman muher di e tanta, lo a mishi cu e mucha y esaki a dicidi di conta su tata di loke a pasa y e tanta e sali mesora na defensa di su sobrina.

Den e caso aki ta hunga un rol delicado sin duda caminda e criatura aki pa un motibo of otro no a cay cerca su mama pa denuncia loke casa di e mama a haci cune, pero a prefera di bay na su tanta y conta di e abuso cu a tuma lugar.

Un indicacion cu e criatura no ta sinti su mes comodo pa confia su mama di e abuso aki y esey sin duda ta algo tristo mirando cu cualkier criatura, den tur cas di famia, mester sinti su mes sigur cu den cas di su mayornan, e ta den e lugar cu mas e ta wordo protehi.

Aki tambe ta surgi un di e problemanan social mas grandi cu tin den comunidad awor y cu e comision  social institui pa Minister di Asunto Social, Glenbert Croes, simplemente no ta capas di atende, corda pa soluciona, esta e rol grandi cu mayornan ta hunga den cuido y proteccion di muchanan menor di edad.

Debi na kisas un situacion financiero hopi dificil den hopi famia, tanto mama y tata ta traha mas tanto cu nan por, lagando cuido y supervision di e criaturanan, den man di otro familiar of den un di e casonan aki, den man di un padrastro.

Un mucha for di momento cu e nace, ta obligacion di su mayornan pa brinda e criatura aki tur proteccion cu e tin mester, na tur momento y riba tur dia di siman, caminda comunicacion continuo entre yiunan y mayornan, ta algo practicamente indispensabel.

Un proteccion pa cual tin cu pone cantidad di asunto un banda, cu ta rekeri atencion p’e mucha na tur momento, riba tur loke e ta haci, for di un bon nutricion te cu loke e ta haci na scol y kico e ta hunga y cu kende e ta hunga.

Den demasiado caso den comunidad, mayornan cu tin cu traha, sea soltera of den relacion familiar, ta baha nan yiu na scol, despues na caso di un famia of conoci of tambe na un centro di supervision, pa busca nan te den oranan di anochi.

E muchanan ta wordo expone na cos- y situacionnan peligroso cu inicialmente pa nan inocencia, nan no ta reconoce y ta te ora cu ta lat caba caminda nan a wordo expone na abuso di un of otro hende grandi, cu algun lo tribi di bin dilanti y denuncia tur loke nan a pasa aden.

Ta un di e mihor armanan cu tin contra di abuso sexual y actonan di inmoralidad contra criaturanan, esta un mihor relacion  entre mayornan y nan yiunan, un relacion di confiansa, un educacion pa yiunan con nan tin cu reconoce un situacion cu no ta bon pa nan y mesora avisa nan mayornan di esakinan. Pa yega eynan ta rekeri un relacion mucho mas intensivo y di confiansa entre mayornan y nan yiunan y riba e dos aspectonan ey, hopi bes e fayo grandi y lamentabel ta sinta.