Edsel ”Payo” Juliet ta yama corona danki

­WILLEMSTAD  – Via via nos a bin comprondé cu Edsel Juliet ta traha riba un produccion nobo. Den e produccion e ta yama Corona danki. Nos conocé Edsel Payo pa su produccionnan chistoso cu ta pone nos hari y gosa. Pero esaki sí a pone nos para keto un rato y mesora nos a tuma contacto cu Edsel Juliet. P’e duna nos splicacion di con e ta gradecido na Corona despues di tanto desaster cu Corona a plama rònd mundo. Casi pa nos a puntr’é si su cabez no ta bon.  

Payo Juliet a cuminsá bisa cu na promé lugar e kier gradicí su amigonan músico cu a traha cu hopi amor riba e produccion akí. Nan ta Eric Calmes, areglo y bas. Igort Rivas, tròmpèt. Dennis Aalse, trombon. Delbert Bernabela, saxs. Alexy Montero, guitara y Eric Ignatia, piano. Kantante di coro ta Daisy Janga, Vallery Kuster, Oongh Evertzs y Eric Wijngaarde. Meskla y adaptacion di ritmo tabata den man di Albert Windster. 

Nos a puntra Payo pa splica nos dicon y pakico el a scoge e título ‘Danki Corona’. Segun Payo Juliet: “Ta fácil. E biaha’kí mi ke pa bosonan scucha letra di e cantica. Sinti boso liber pa interpretá e locual cu boso ta comprondé y haña di mi composicion”.

Nos a scucha y mira e video completo. E ta zona mashá bon mes. A la Payo, mescos cu tur Edsel Juliet su otro composicionnan.

E cantica ta habri cu experiencia di un hende cu ta conta cuanto bèrguensa y miedo esnan cu a pega cu e virus di corona tin pa papia riba dje.

Ta manera cos cu ta un crímen nan a cometé. Nan tin miedo cu lo huzga nan y cu hende lo mustra dede riba nan. Den e produccion akí Payo Juliet ta mustra riba e impacto di e virus di corona. Pasobra segun Payo nada no ta sosodé sin motibo. “Corona, b’a pone mundo para keto”.

Payo ta canta e frase aki dos biaha den su piesa. Pero e ta canta tambe e cosnan bon cu corona a siñ’é. Y ta p’e motibo ey, Edsel Payo Juliet, ta yama e virus di corona danki.  

“Si mi mensahe por yuda habri wowo di un y tur cu a scuch’é, mescos cu el a habri esun di mi, esey ke men cu mi a cumpli”, Edsel ta bisa na final di nos entrevista. Tur hende por pidi e muziek y tambe e videoclip. Pa mas informacion por tuma contacto via edseljuliet@hotmail.com òf via WhatsApp +31 648185112.