Gobierno ta sufri di gañamento patalogico y ta un peliger pa hasta instancianan gubernamental

Ultimamente nos por mira cu integrantenan di Gobierno di Aruba tin e sindrome di ta gañado patalogico y kier pone nos pueblo kere cu loke nan ta bisa ta berdad. Dia pa dia, nan ta perdiendo tur clase di credibilidad. Nos a mustra caba na multiple ocasion con Prome Minister Evelyn Wever Croes a bin ta trata na bende nos un cuenta cu ta Hulanda a impone e.o. e condicionnan Hulandes pa por sigui haya ayudo, mientras di otro banda Hulanda na su turno ta bin liña recta y bisa cu tur loke a keda acorda ta a base di loke a delibera cu Aruba.

Asina aki nos por mira con, sin un consulta real cu gremionan, Prome Minister di Aruba a sera un convenio cu Hulanda riba diabierno 13 di november 2020, perhudicando nos pais y nos institutonan. Lider di UPP, Booshi Wever a duna di conoce.

E gañamento a plama manera un pandemia den e gobernacion aki. Recientemente Minister Andin Bikker a declara di no tin nada di haber cu e acusado di pedofilia, ya cu e persona aki lo no ta traha cu n’e. UPP p’awor lo abstene pa duna un opinion riba e caso mes, pero energicamente ta opone tur tipo di abuso sea mental, fisico of sexual y sigur casonan repudiabel di pedofilia.

UPP ta cuestiona e actitud di e Minister di Husticia cu di ripiente ta purba di distancia su mes for di e persona.

Segun e mandatario su ministerio lo ta deal cu un compania di locual e casa di e acusado lo ta directora y e acusado lo ta un trahado.

E Minister parce di tin un memoria selectivo, pasobra tin asina tanto evidencia cu ta relaciona e persona aki cu Otmar Oduber, e circulo di POR y hasta di e mesun Minister Bikker. Lo a haci husticia y honor n’e berdad y n’e victimanan, si Minister Bikker por djis admiti cu e acusado tabata traha cu n’e, pero debi na e situacion cu a presenta lo e no ta den e circulo di e Minister mas. Pero NO ban sigui gaña numa, manera a para custumber den e Gobierno aki.

Un otro ehempel ta Minister Dangui Oduber. Segun Booshi Wever, “dialuna 21 di februari, mi a acudi na San Nicolas, Santa Theresita Center, pa mi haya mi vacuna. Pa defende su peyeho contra critica di un Parlamentario opositor di ta faborece amigonan politico, Minister Dangui Oduber a haya ta bon pa usa como defensa cu e opositor mas grandi di Gobierno ta prome pa tuma vacuna na San Nicolas”.

Pa cuminsa, Booshi Wever, como ciudadano, a aplica pa un cita pa vacuna y a acudi riba e dia cu un instancia di Gobierno a invit’e. Pakico e Minister no a respeta privacidad di su persona y mester a politisa un acto asina?

Dicon Minister no ta bisa cu ora nan a bin invita Booshi Wever pa saca potret el a nenga pasobra e no tabata desea di ta un otro decoracion den e kerstboom politico. Esaki ta un otro muestra cu e Gobierno aki ta biba di gañamento pa gañamento.

E gañamento patalogico aki ta bira un problema ora cu esaki haci acto di presencia tambe den e instancianan di Gobierno, manera ta p.e. e caso di Tele-Aruba. Aparte di gañamento tin un maneho cu ta dirigi riba manipulacion orkestra dor di Gobierno y dirigi p’e Director Giovanni Kock cu ta sigui e instruccionnan sin hiek.

Pronto nos lo bin back riba e maneho aki cu ta bay contra tur regla di “fair-play” y e derecho sagrado di expresion.

Na september benidero sinembargo pueblo lo haya e oportunidad pa caba cu tur e gañamentonan y manipulacionnan. UPP den su REBOOT 2.0 ta priminti un manece nobo p’e pueblo di Aruba cu ta percura p’e felicidad y prosperidad yega den tur hogar na Aruba.