IMF a elogia e forma con Aruba ta trahando pa recupera economicamente

Dialuna ultimo Prome Minister Evelyn Wever-Croes a reuni cu IMF den cuadro di nan mision di consultacion di articulo 4. Cada dos aña IMF ta evalua Aruba su posicion financiero y den esaki nan tabatin varios pregunta.

Prome Minister a indica cu Gobierno ta contesta mas tanto pregunta posibel cada biaha cu reuni cu IMF. Mester bisa cu IMF ta hopi impresiona cu e forma con Aruba ta atende cu e crisis, mescos cu nan a bisa na comienso, Aruba ta un di e paisnan den region cu mas fuerte a wordo afecta pa Covid debi cu tabata depende demasiado riba turismo y turismo a wordo hopi afecta.

Sinembargo nan tin hopi elogio p’e strategia agresivo cu Aruba tin di test y especialmente e strategia cu tin di vacunacion aworaki. Esey ta pone cu Aruba ta score mas halto cu otro paisnan den region pa loke ta trata recuperacion di turismo.

Aparte di esey a toca e tema tambe di e gastonan salarial den Gobierno y nan a remarca cu nan ta compronde cu mester a corta aña pasa den gastonan di salario di empleadonan publico cu 12,6%.

Pero nan no ta kere cu esey ta algo structural, pues nan ta di opinion cu e gastonan ya tabata halto prome cu Covid y e 12,6% no ta algo cu lo bay keda largo, pero cu Gobierno lo mester bin cu otro moda pa baha e gastonan salarial na un forma mas structural.

Prome Minister ta di opinion cu nan tin rason den esey y ta algo cu ya ta trahando riba dje desde prome cu Covid.

Un otro tema cu a toca ta e cortamento den gastonan di cuido y eynan nan a comenta cu nan ta haya cu e forma con Hulanda ta impone esaki no ta bon. Berdad por tin ineficiencia, pero esaki no t’e momento pa bin cu e cortamento di 5 miyon florin pa luna.

“Esey ta a base di locual Aruba mes a informa nan y ta contento cu nan tambe ta mir’e manera nos ta mir’e. Esaki lo yuda nos mas den dialogonan cu Hulanda”, Premier Wever-Croes a expresa.

Tambe IMF tabatin pregunta riba e tema di integridad, inovacion y energia, pa cual Premier Wever-Croes a suministra tur informacion.

Fin di siman lo ricibi e prome conclusion di nan mision y a base di esey lo sa ki t’e siguiente paso cu mester tuma. Pa conclui, Prome Minister a bisa cu e tabata un bon reunion cu hopi elogio pa Aruba p’e forma duro cu Aruba ta trahando pa por recupera y reconstrui e economia.