Maestronan di Emmaschool malcontento cu minister di Enseñansa.

Diaranson mainta, tabatin un reunion cu maestronan di Emmaschool hunto cu sindicato SIMAR y SEPPA. Nan a sinta dialoga riba e carta di Minister Rudy Lampe, un carta cu un contesta ridiculo y no profesional.

Den e carta Minister a pone cu e no debe sindicato ningun splicacion, sino Staten so. Den otro palabra, docentenan no merece un splicacion, nan mester djis acepta y guli manda abou.

E manera dictatorial aki no a alegra e maestronan, ya cu esaki ta lo contrario di loke enseñansa ta representa y ta siña e muchanan. Esta, pa semper puntra p’asina por compronde.

Maestronan no ta bay acepta e maneho aki y ta bisa cla cu por bay spera un reaccion di nan banda. Tambe Minister Rudy Lampe a bolbe intimidanan cu no work= no pay, mientras cu ya caba nan tabata solidario y pa entrega 12.6% di nan salario.

Sindicatonan ta haya cu Minister di Enseñansa su manera di maneho a causa un desaster e ultimo añanan aki den enseñansa por completo. El a ataca varios scol caba, sin pensa ki efecto tur esaki lo tin pa enseñansa en general. Sindicatonan Simar y SEPPA ta haya cu Minister Rudy Lampe mester ta transparente, e mester por presenta su plan y dialoga cu esnan cu diariamente tin cu atende cu e problemanan aki. En conclusion, sindicatonan hunto cu e maestronan ta bay keda para pa derecho di mucha y ta bisa cu ta bay tin reaccion.