Minister Rudy Lampe lo no bin bek den Gobierno y su maneho ta confirma esey

Gabinete Wever Croes ta den su ultimo lunanan den gobernacion di e pais y esaki ta notabel dor di e maneho cu ta ser hiba ya pa tres aña caba y caminda algun Minister ta duna e impresion cu nan ta determina pa daña mas tanto cos cu nan por y laga e proximo Gobierno cu cantidad di problema pa soluciona.

Minister di Enseñansa Rudy Lampe ta un di e mandatarionan aki, kende ta determina pa haci loke cu e kier sin tene na consideracion loke esnan cu ta traha den e sector aki, ta pensa of kier mira.

Ora cu analisa e maneho controversial di Minister Lampe, e ta duna e impresion cu su persona nunca lo por tabata parti di clero, cu e tabata un Sacerdote den Iglesia Cristian aki na Aruba ya cu forma di procede, no ta contene ni compasion y tampoco comprension pa otronan.

E forsa di Minister Lampe ta sinta den e hecho cu su partido RED cu tin un solo asiento den Parlamento, loke ta duna e partido aki un poder mas grandi cu por ehempel partido MEP cu ta conta cu 8 asiendo den Parlamento.

Ta for di algun tempo caba, por bisa mas c’un aña caba, Minister Lampe a mustra bon cla cu ningun hende tin algo di bise, ni Minister Presidente y pa colmo tampoco Parlamento cu t’e instituto cu mester controla su maneho y bise kico e por y kico e no por haci.

Parlamento hasta a aproba un mocion den cual ta exigi di Minister Lampe pa duna cuenta na Parlamento riba decisionnan cu e ta tuma pa loke ta maneho di enseñansa, pero ningun momento esaki a tuma lugar y Lampe ta haci loke cu e kier y contra ken cu e kier.

Ayera mainta pa di tantisimo bes, maestronan di scol, e biaha aki di docentenan di Emmaschool, a bin dilanti pa denuncia e pensamento y maneho abusivo di Minister Lampe, kende den un carta pracitamente a bisa e maestronan cu nan tin cu sinta keto, scucha y haci loke su persona ta bisa.

Un reunion cu a tuma lugar na cede di sindicato di maestronan, esta SIMAR caminda tambe tabata presente e sindicatonan di SIMAR y SEPPA.

Un carta di Minister Lampe riba un carta cu e maestronan a dirigi na su persona, e ex pastoor aki a reacciona den un forma asina “onbeschoft”  cu por bisa e ta ‘religieus onwaardig,’ ya cu practicamente el a bisa e maestronan cu mihor nan sera nan boca y haci loke e ta bisa como Ministrer di Enseñansa.

Aruba a conoce hopi Minister cuestionabel, hopi Minister controversial, pero nunca un Minister asina “onbeschoft” manera e actual Minister di Educacion, ya cu e ta insisti cu su persona ta doño di enseñansa aki na Aruba y cu maestronan tin cu acepta loke su persona ta dicta y exigi.

E dos sindicatonan hunto cu e maestronan a dicidi di dirigi otro carta n’e Minister aki, loke ya caba por anticipa cu esaki ta tempo perdi ya cu Lampe lo no tin otro declaracion pa duna, sigur awor cu el a falta respet pa opinion di e maestronan.

Minister no kier dialoga, e no kier discuti mes cu e maestronan di Emmschool y ta demostra un actitud y mentalidad sabiendo bon bon, cu su dianan ta conta y cu e lo no tin consideracion cu ningun hende, principalmente maestronan.

Ta tristo ora cu gobernacion di e pais, ta tuma lugar riba e nivel aki, un nivel mediocre, un nivel dictatorial y cu ta conta cu ‘blessing’ di Gabinete Wever Croes ya cu den e Gobierno di coalicion aki, e anhelo pa keda na poder ta riba e inters di pueblo en general.

E confrontacionnan aki lo continua ya cu den Gabinete Wever Croes mes no tin oido p’e gritonan di auxilio di maestronan y e gran cambio lo tuma lugar na septemer proximo, ora cu tanto Minister Lampe como resto di Conseho di Minister, lo wordo manda cas pa tanto abuso, tanto falta di respet di e magnitud aki.