Diamars merdia algo pasa di 1:30, patruya policial di Playa controlando banda di EPB Hato a nota un Nissan March sospechoso.
E vehiculo aki tabata para na altura di e snack conoci pazuid di e scol. Manera cu esnan den e auto a mira Polis nan reaccion tabata di move for di eybanda mesora.
Aki mas cu claro e agentenan atento a bay nan tras y a logra paranan poco mas pazuid, net cu nan tabata drentando Caya Frere Laurentius. Den e vehiculo tabatin tres persona.
Polisnan a sigui protocol y bay over pa controla e plachi number, di cual no tabata cuadra y e chauffeur no por a mustra ningun documento valido di e vehiculo tampoco.
Mirando cu esnan den e auto tabata haci straño, e di dos paso a bira pa controla e vehiculo. Aki ta unda Polisnan a canta bingo.
Durante e listamento a bin haya un tas cu droga, placa y un cuchiu. Aki Polis a detene tur persona y a pidi pa un transportwagen.
Pues tres hoben a wordo deteni y hiba warda, unda cu nan lo bay wordo cuestiona riba e droga y placa haya den e auto. Ta mustra den direccion cu probablemente nan ta core rond bende/deliver droga.
Takelwagen a wordo pidi pa bay cu e auto pa mas investigacion.
