Preveni Abuso di Menor

Un di e mihor forma pa prepara bo yiunan contra e peligernan di abuso di menor ta dor di papia cu nan y conscientisanan pa nan reconoce cierto señal cu por yuda preveni un situacion di maltrato of abuso den futuro.

Algun tips:

Papia cu bo yiunan tocante comportacionnan apropia y inapropa: Papia cu bo yiunan pa reconoce situacionnan sigur y insigur: Siñanan kico pa haci ora un persona actua inapropia cu nan y con pa busca ayudo.

Mantene un comunicacion habri cu bo yiunan, p’asina abo como adulto por identifica cosnan cu ta fuera di normal den nan comportacion: Percura pa bo hogar ta un lugar sigur pa bo yiunan.

Preveni di laga bo yiunan nan so of cu un persona cu bo no conoce bon. Semper ta na altura como mayor unda bo yiunan ta ora nan bay Sali.

Siñanan kico ta sexualidad na un forma cu ta apropia pa su edad, esaki ta cuminsa di edad chikito cu e conocemento cu un mucha ta diferente cu un adulto.

Custuma di yama e parti priva di un mucha na su nomber y no dun’e un nomber manera “koekie”

Educa bo yiunan cu ningun hende mag di mishi cu nan partinan priva sin nan permiso, esaki ta conta pa abo tambe como mayor.

Locual cu tambe ta yuda ta pa abo como e adulto responsabel pa un mucha desaroya un bon relacion cu e personanan den e bida di e mucha por ehempel; su docentenan, su “baby-sitter”, e mayornan di su amigonan, su coach di sport entre otro.

Tur esaki por yuda pa preveni posibel abuso di mucha, dor di duna e menor e hermentnan p’e mes por reconoce e peliger ora cu abo como mayor no t’ey. E ta yuda tambe na desaroya un “netwerk” fuerte den e bida di un mucha cu ta importante p’e sosten y vigilancia den cualkier situacion delicado.

Como mayor, educador of cuidado di mucha bo por busca informacion, ayudo y guia tocante educacion y lantamento di mucha cerca Tienda di Educacion por yama na 161 of cerca Fundacion Pa Nos Muchanan por yama na 588-0856  of 583-4247.

Pa ayudo y conseho den educacion contra abuso di menor por tuma contacto cu Fundacion RespetaMI na 582-4433. Ora bo ta sospecha abuso di menor tuma contacto cu Bureau Sostenemi na 588-1010 pa conseho y  ayudo. Den caso di emergencia yama 100.

Pa haya sa mas tocante abusi di menor bishita nos website www.scparuba.com. “E bienestar y seguridad di nos muchanan ta responsabilidad di nos tur”, di acuerdo cu Sociaal Crisis Plan.