Promesa cu prespuesto 2021 lo ta na Parlamento na luna di februari a caduca

Presupuesto 2021 di pais Aruba segun ley di comptabilidad, mester a wordo entrega na Parlamento dia prome di september 2020, pero esaki no a tuma lugar, pa motibo di discusion y negociacion cu Hulanda, pero tabata di 4 presupuesto di Gabinete Wever Croes, cu no a cumpli cu e ley aki.

Na luna di december den un declaracion na medionan di comunicacion, Minister di Finansa y Economia, Xiomara Maduro a sigura cu presupuesto 2021 lo yega Parlamento no mas tarda cu luna di februari 2021, pues awe ta 3 di maart, tin cu confirma cu e fecha aki tambe a caduca sin splicacion algun.

No solamente a declara esaki n’e pais, pero Gabinete Wever Croes tambe a sigura Hulanda cu e lo keda cla pa luna di februari cu cambionan y otro palabracionnan haci cu Hulanda y CFT con e presupuesto aki mester ta hinca den otro.

Te ainda awe 3 di maart, Gobierno no a anuncia ki dia e presupuesto aki lo ta pa tratamento den Parlamento, ya cu tur cos ta indica cu despues di remarcanan di CFT riba e concepto inicial manda p’e comision aki, Gobierno mester a haci ahustenan y tambe mester a cambia diferente punto mas cu parce ainda no a logra di completa.

Gabinete Wever Croes no por saca su curpa pa su maneho deficiente hiba pa loke t’e solucionnan financiero cu tanto el e priminti cu e tin na 2017 durante di campaña electoral caminda Prome Minister Evelyn Wever Croes den un post fecha 10 di augustus 2017, a sigura henter pueblo cu “MEP lo atende problema financiero di Arua sin medida”, pero awe henter pueblo a conoce di cerca e incapacidad di e Gobierno di e Prome Minister aki.

No ta conoc ainda e motibo di e tardansa aki, pero segun ley di comptabilidad Gobierno despues di entrega presupuesto 2021, e tin seis luna mas pa hinca presupuesto 2022 den otro, loke ta obligacion di Gabinete Wever Croes, mirando cu na luna di september tin eleccion pa un Gobierno nobo.

Gabinete Wever Croes fuera di promesanan haci sin cu a wordo cumpli, tambe a promove bon gobernacion, a papia di integridad den gobernacion y un Gobierno cu ta respeta su mes, cu ta integro, tin cu cumpli cu su responsabilidad di hinca e presupuesto 2022 den otro, pero tin poco speransa cu esaki lo tuma lugar cu e Gobierno actual, mirando cu mitar aña a pasa bay caba di 2021 y ainda no tin presupuesto.

Te ainda no tin mucho claridad kico lo t’e consecuencianan di acuerdo firma pa Prome Minister Evelyn Wever Croes y Hulanda, pero cierto maniobranan ta mustra cu no tin nada alentado na caminda y Gobierno ta trata di alarga e tempo mas tanto cu por, sigur awor cu dentro di algun luna lo tin eleccion pa un Gobierno nobo.

Mientrastanto si por sigui scucha y tuma nota cu Gabinete Wever Croes ta sigui cu su asina yama ‘afscheidbeleid’ caminda tin nombramentonan ta sigui tuma lugar, hendenan ta sigui wordo poni den servicio di Gobierno, mientras cu en realidad Gobierno tin cu manda hende cas y CFT a mustar bon cla, cu ainda Gobierno no a cumpli cu e parti importante di baha gasto di personal.

Varios indicacion cu tin varios Minister ta creando algun departamento of seccion nobo den nan ministerionan y p’esakinan lo ta tumando hende den servicio, manera cu Minister Dangui Oduber a haci ora cu el a dicidi di nombra cinco di su coordinadonan den un sector nobo na departamento di salud pa transporta pashentnan cu tin mester di tratamento medico pero no tin transporte pa bay haya tratamento.