Propiertarionan di barnan na San Nicolas malcontento cu problema di prostitucion grave y estado actual di nan negoshi

T’asina cu desde e coronavirus a dal, hopi negoshi a bay atras pero mas ainda lugarnan concerni cu entretenimento y aglomeracion di hende – y e doñonan no ta niun tiki contento.

Doñonan di bar kier sa ki dia nan mag di cuminsa opera normal bek. Asociacion di barnan na San Nicolas a manda varios carta pa gobierno, pero a keda sin contesta.

Jose Da Silva, propietario di G-Spot, ta conta cu for di e 950 florin cu Da Silva ta haya for di FASE, na final di dia e placa ta keda den caha di gobierno. Aunke e barnan ta cera, e propietarionan tin e obligacion di paga nan permiso anual.

E ta splica acerca cu nan a keda warda ariba contesta di gobierno cu pasenshi y mientras tanto tawata cumpli cu e reglanan y protocol mane cualkier negoshi, ademas di paga impuesto di permiso anual.

Ademas, mane por ta conoci caba, e number di hende muhe cu ta traha den prostitucion akinan na Aruba a subi, incluyendo hende muhe rubiano, debi n’e temponan desespera di e pandemia y mas awo den barnan ilegal cu ta drei tra’i lomba di polis y hasta den cierto caso den cara di polis mes.

Por haya nan hopi biaha den bar, unda c’ e doñonan mes ta kehando di e ‘fenomeno di prostitucion ilegal’ andando cu ta tuma lugar den nan negoshi, asina Da Silva ta conta.

Doñonan di bar ta pidi gobierno pa yega n’un solucion pronto mirando cu mayoria di nan ta biba di e mundo aki.

Tambe e ta conta cu SANI-BAR a tene reunion cu minister Andin Bikker tocante e problema andando na San Nicolas di prositucion algun aña pasa, pero cu a resulta na nada.

Mas o menos un aña pasa prome cu e pandemia a dal, Da Silva ta bisa cu nan a acerca Guarda Nos Costa tambe tocante e problema aki, unda a informanan di diferente lugarnan unda prostitucion ta drei, mas tanto na San Nicolas pero tambe na Playa. E ta bisa cu nan tin añanan caba tras di e problema aki, pero cu niun rato algo a wordo haci contra esaki y cu te ainda e ta andando – sino mas awo den e temponan aki.

Como doño di bar e ta experiencia frecuentemente cu e hende muhenan aki ta bin puntr’e pa traha di prostitucion na su negoshi pero cu cada biaha mester nenga nan, aunke cu pa un tempo el a biba di esaki ora cu e no a wak ningun otro solucion pa salba su negoshi di 30 aña mirando cu esey tawata e unico entrada cu e tawatin den e tempo ey – maske cu el a menciona cu e nunca a permiti trabou ilegal den su establecimento.

Propietario di Roxy Bar, Marcel de Cuba, ta splica cu e ta sinti cu gobierno “ta midi cu dos midi den negoshi di bar”. Mientras cu na Playa barnan nobo ta habri, ainda p’ariba di brug ta morto. De Cuba mester a hasta bende su cas p’e wanta cabes ariba di awa.

De Cuba a reclama gobierno puntrando pakico bebemento di cerbes pafo’i minimarket si ta permiti, pero no na un bar. E tambe como manehado di un negoshi kier mira un cambio of sikiera haya un respuesta pa cu e estado di su situacion, hasta rogando gobierno pa dunanan contesta riba kico nan por haci pa por sigui opera sin cera.