CFT ta pidi pa cuentanan anual di casi 30 instituto gubernamental cu ainda no ta cla

Cu gran satisfaccion Prome Minister di Aruba a mustra riba su reunion sosteni cu IMF cual instituto financiero, lo a elogia e maneho economico di su Gobierno.

Sinembargo ta lanta e pregunta ta di con ta Prome Minister ta papia di asuntonan economico y financiero cu IMF, mientras cu e Minister concerni mes, esta Xiomara Maduro, lo no a haci esaki.

Un contraste grandi ta loke Prome Minister ta declara di e reunion cu IMF, mientras cu CFT recientemente riba su website, a mustra den un di su raportahenan, cu ainda Gobierno no entrega mas cu 25 cuenta anual di diferente instituto of compania estastal, loke mester a tuma lugar segun reglanan existente for di dia 15 di september di 2020.

Aki tin cu remarca cu ta di compronde cu Gabinete Wever Croes no por a entrega esakinan ya cu con esakinan por ta cla si ainda presupuesto 2021 cu mester a keda cla caba for di dia prome di september di 2020, ainda awe 5 di maart 2021, ainda no a yega Parlamento pa wordo trata.

Pa colmo ta trata di companianan estatal di peso manera entre otro Refineria di Aruba NV, Fuels  Marketing  Supply Aruba, Aruba Ports Authority, Utlities Aruba Nv, Arubus NV, Post Aruba, ANSA NV caminda ta bon pa mustra cu di Arubus no tin cuenta anual for di 2016 te cu 2019, mientras cu Post Aruba falta cuenta anual for di 2015 te cu 2019.

FMSA no tin cuenta anual for di 2018 y 2019, ambos den un periodo cu varios cambio a tuma lugar den e companianan aki, caminda Gabinete Wever Croes a pone un experto atende cu maneho di esakinan den persona di Richard Eman.

Otro compania estatal grandi cu ta Utilities Aruba NV no tin cuenta anual for di 2017 te cu 2019, pero aki tambe tin un Hunta di Comisario nombra pa Gabinete Wever Croes vigilando maneho di e compania aki, pero algo a bay robes cu e situacion aki cu a presente y denuncia pa CFT.

Fuera di e companianan estatal aki, tin retraso tambe den cuentanan anual di fundacionnan subsidia pa Gobierno y aki tin cu menciona cu Serlimar, un compania cu Gabinete Wever Croes riba peticion di ex Minister Otmar Oduber na varios ocasion a pidi y haya miyones pa salvaguardia e compania, no a entrega cuenta anual for di 2017 te cu 2019 cu ta aclaria en parti e situacion delicado cu e compania aki ta pasando aden n’e momentonan aki.

Tin fundacionnan manera Lotto pa Deporte, cu falta cuenta anual di 2015 y 2017, Universidad di Aruba cu falta 2017 y 2018 mientras cu Volkscredietbank no tin cuenta anual for di 2017 te cu 2019, mientras cu Parlamento di Aruba tampoco tin cuentanan anual na ordo di tanto 2015 te cu 2019.

Asina CFT a menciona varios otro fundacion y companianan estatal cu e cuentanan aki no ta conoci y ta algo cu Gobierno mester a entrega masha dia caba, sigur un Gobierno cu a papia semper di integridad, di tin solucionnan p’e situacion financiero di e pais, cu ta traha den un forma transparente, pero cu en realidad no ta cumpli cu reglanan di bon gobernacion. Un biaha mas Gobierno pa medio di Prome Minister ta trata di tapa e situacion bruha aki cu tin,  pero cu CFT ta sigui tik riba dedenan di Gobierno pa cumpli cu su obligacionnan y ta mas cu claro e ora cu Gobierno Hulandes ta bolbe mira cu promesanan haci pa Gabinete Wever Croes, nunca ta wordo cumpli manera cu mester ta.