Minister Xiomara Maduro a reuni cu sr. Ernst Noorman Embahador di Reino na Colombia

E siman aki Minister Xiomara Maduro hunto Ministernan Chris Romero y Andin Bikker a reuni cu Embahador di Reino Hulandes na Colombia, sr. Ernst Noorman. Durante e reunion a toca e relacion cu Aruba tin cu Colombia riba varios tereno, entre nan, comercio, hudicial y tambe cultural.

Dia pa dia Colombia ta bira mas importante pa Aruba riba e tereno comercial y pesey durante e mision comercial di Reino na november 2019, Minister Xiomara Maduro a haci uso di oportunidad pa presenta e 6 sectornan prometedor pa diversifica economia di Aruba na inversionista potencial.

E bon contacto cu Embahada Hulandes sigur ta yuda den e proceso pa acerca inversionistanan Colombiano y pesey Minister Maduro ta aprecia y ta gradici p’e bishita di Embahador Noorman pa keda na altura di e situacion na Aruba y pa transmiti nos deseo pa keda cu un bon relacion cu Colombia.