“Nos mester ta alerta y sigui cuida”

Ayera mainta, durante un conferencia di prensa, Prome Minister a elabora riba e tema di Covid.

Den e luna di februari Aruba a cuminsa cu 334 caso activo y te cu 3 di maart 2021 esaki a baha te na 174. A pesar cu cantidad di caso a baha den luna di februari ainda tin un average di 28 caso nobo pa dia.

Tambe a tuma nota cu februari tabata un luna unda e cantidad di fayecidonan tabata hopi halto. E cantidad di persona cu a perde nan lucha contra Covid den e luna di februari tabata 13. Actualmente tin 27 persona hospitaliza y 10 persona ta den intensive care. Dus cantidad di personanan den hospital si ta aumentando y esaki ta motibo pa preocupacion.

Di e Variante Ingles tin un total di 21 caso activo constata na Aruba.

Mester sigui ta alerta y sigui cuida, pasobra nos por mira cu e cantidad di fayecidonan, personanan hospitaliza y e Variante Ingles ta aumentando poco poco.

Den februari Aruba a cuminsa cu vacunacion. Prome Minister ta sumamente contento con esaki ta bayendo y ta sigui motiva hende pa registra pa tuma e vacuna.

Ainda tin hopi hende cu ta duda di tuma e vacuna. E ta scientificamente comproba cu esaki lo protehe bo pa bo no haya efectonan severo si acaso bo wordo contagia cu Covid.