Pasenshi ta cabando, SIMAR Y SEPPA a duna te diamars awor pa haya contesta

Maestronan di Emmaschool hunto cu sindicatonan di SIMAR Y SEPPA a entrega manifiesto, pasobra nan no ta contento cu maneho di Minister Rudy Lampe. Por bisa cu nan pasenshi ta cabando y a duna Gobierno y Parlamento te cu diamars awor pa haya contesta riba nan manifesto. Maske ningun hende a bisa kico lo pasa despues, por conclui cu accionan lo acelera.

Ayera mainta maestronan di Emmaschool hunto cu sindicatonan di SIMAR y SEPPA  a entrega nan manifiesto na Prome Minister, Evelyn Wever Croes, kende a invita nan pa un reunion pa haya splicacion di kico ta pasando. Segun Josephine Albertus, e reunion a bay bon, pero esey no nifica cu e problema ta soluciona. Despues nan a bay Parlamento pa nan entrega e manifesto aki tambe na Presidente di Parlamento, Ady Thijsen kende a priminti cu  den curso duna e sindicatonan nan opinion.

Prome Minister a scucha e delegacion aki atentamente y a tuma nota di nan preocupacion. E delegacion aki a haci un peticion cu pa prome cu 9 di maart nan kier un contesta positivo. Nan no ta di acuerdo cu e fusering cu Minister Rudy Lampe a anuncia. Nan ta di acuerdo cu tur cos mester di inovacion, pero nan ta di opinion cu Minister Rudy Lampe no ta tumando decisionnan na un manera responsabel. Su actuacion ta uno dictatorial.