Prome Minister Evelyn Wever Croes ta bolbe culpa Hulanda

Gobierno ta forsa pa corta 60 miyon den cuido medico, asina Prome Minister Evelyn Wever-Croes a declara na inicio di siman aki. Aki Prome Minister Evelyn Wever Croes, un biaha mas a cuestiona e forma con Gobierno di Hulanda ta presiona su Gobierno pa reduci gastonan di operacion, principalmente pa loke ta reduccion di costo den e parti di cuido medico.

Manera ta conoci ya Gobierno a impone un reduccion di 5 miyon florin pa luna loke ta bira un suma astronomico di 60 miyon pa aña, pero caminda algun luna atras, Secretario di Estado Raymond Knops, a bin dilanti y confirma cu e medida aki no ta uno cu Hulanda a impone, pero ta un medida cu ta Gabinete Wever Croes mes a sugeri pa tuma.

A pesar di e discusion publico aki entre Prome Minister di Aruba y Knops, dialuna ultimo Evelyn Wever Croes a bisa lo siguiente: “Cortamento den gastonan di cuido di 5 miyon pa luna, ta algo Hulanda a impone esaki y e no ta bon”. IMF tampoco ta aproba esaki.

Pues un di e dos gobernantenan aki ta gañando barbaramente, pero cu e reputacion di gobernante y politico gañado cu a bira conoci di Prome Minister Wever Croes, ta mas cu claro cu ta inclina mucho mas pa kere palabranan di Knops y no e rol di victima cu Gabinete Wever Croes kier hunga cu e asunto aki.

No solamente e punto ey, pero den e conferencia di prensa aki, Prome Minister di Aruba ta mustra su satisfaccion cu resultado di e reunion cu IMF caminda el a mustra cu e instituto financiero aki a elogia e maneho di recuperacion economico cu su Gobierno ta hibando.

Te dia di awe, ningun hende na Aruba, ta na altura di e maneho of contenido di e maneho aki ya cu tur loke ta bin dilanti den ultimo simannan, ta medidanan contra pueblo cu Prome Minister a firma cu Hulanda den e Landenpakket.

No tin solucion pa turismo, no tin solucion pa aumento espantoso di criminalidad, no tin solucion pa loke t’e cifra halto di desempleo, ya cu realmente Gobierno no por ehecuta ningun proyecto aworaki cu por yuda den e seccion aki, no tin indicacion kico lo para cu problemanan serio cu ta bay surgi pa motibo di reduccion di 5 miyon pa luna den cuido medico.

No tin solucion pa nada, pero segun Prome Minister IMF ta contento cu loke su Gobierno ta hacienda, pero lo tabata na su lugar pa Evelyn Wever Croes trata di busca pa sa si den pueblo tin alegria y satisfaccion pa su maneho economico.

Comerciantenan a mustra nan preocupacion masha dia caba, caminda a ser mustra bon cla cu no tin indicacion di kico ta bay pasa, di con lo bolter e crisis economico cu tin n’e momentonan aki, mientras cu Gabinete Wever Croes ta sigui cu plan di introduci ainda mas medida contra pueblo cu entre otro introduccion a corto plaso di e conocido BTW di 12.5%.

Awor un biaha mas, cu a pesar cu a bira conoci cu cortamento di 60 miyon pa aña den cuido medico ta un idea cu a sali for di propio vision di Gobierno di Aruba, Prome Minister ta insisti pa mustra awor cu e forma con Gobierno di Hulanda kier impone e medida aki den sector di cuido medico, no ta bon ya cu no ta momento pa bin cu cortamento di 5 miyon den e sector aki.

Pa colmo Prome Minister ta confirma for di su propio boca, cu e reduccion aki di 5 miyon den cuido medido, ta algo cu su Gobierno a informa Hulanda cu ta un posibilidad pa mustra cu lo baha gasto di Gobierno.

Hungando wega pa libra su Gobierno di e culpa Evelyn ta mustra cu nan ta contento cu Hulanda tambe ta mira e situacion den cuido medico manera cu nan tambe ta mir’e,  pero no cu Hulanda a dicidi di “hap” p’e pensamento aki di su Gobierno. No tin sinceridad den palabranan di Prome Minister Evelyn Wever Croes, no tin seriedad y sigur su persona no ta tuma responsabilidad pa decisionnan hororoso cu su Gobierno a bin ta tumando pa mas di diez aña caba den su maneho di e pais.