E “malaise” economico den caya grandi

Tal bes cu bista riba eleccion e aña aki, recientemente un corant local a bolbe culpa Gobierno p’e ceramento di negoshinan den caya grandi, pasobra “nan a trese e tram”. No ta pa defende Gobierno, pero mi ta kere cu e culpa mester wordo busca otro caminda. Y en bes di tira culpa, Gobierno mester busca un e remedi pa e malesa economico den e parti aki di Caya Betico Croes.

Cuater aña pasa mi a skirbi cu CNN-Money a publica un articulo cu ta conta cuanto negoshi a sera y ta bay sera na Merca y na Canada. Ascena Retail Group, doño di e.o. Ann Taylor y Lane Bryant cu ta tiendanan di fama mundial, a anuncia cu nan ta bay sera 250 tienda na 2017 y si nan no logra haya reduccion di huur, nan lo sera 400 tienda mas. No ta culpa di tram.

Mall bashi ta un realidad na Merca y Canada. Segun Credit Suisse, na aña 2022, 25 % di tur mall na Merca y Canada lo sera. Tiendanan manera Macy’s, Saks Fifth Avenue, J C Penney y Sears cu ta wordo considera tiendanan “anker” di e mall grandi ta pasando den turbulencia economico y ora nan sera, e mall caminda nan ta localisa ta cuminsa muri.

Durante 2018 y 2019 tabatin un crecemento grandi di negoshinan cu a bati bankroet y mas di 15 mil tienda a sera.

E cifranan aki no ta exageracion. Macy’s mes a anuncia cu na 2017 nan a sera por lo menos 68 tienda. Saks Fifth Avenue y Lord & Taylor no a specifica cuanto tienda nan a sera, pero nan a declara cu e aña ey nan a elimina mas di 2000 empleo.  J C Penney’s a sera 138 tienda. GameStop a elimina mas di 100 tienda.  K-Mart y Sears a sera 150 di nan tiendanan 2017. Ta miles di tienda mas chikito ta pasa den e mes tormenta economico.

Kico ta causante di tur e seramentonan aki? Naturalmente no ta tram. E criticonan di e tram den caya grandi ta insisti cu e tram ta stroba e autonan trece e cliente te dilanti di e tienda. Na e mallnan cu a sera, autonan por a core te na entrada di mall.

Hopi experto ta punta dede riba Amazon y e cumpramento online, argumento hopi fuerte. 

Talbes na Aruba nos mester wak loke ta pasando na Merca y ahusta nos mes n’e realidadnan nobo di bida. Di Aruba tambe nos por haci uzo di e servicio di Amazon.

Di Aruba tambe nos por haci pedida online. Talbes e doño di e edificionan ta cobrando huur. En bes di e splicacion simplistico, “ta tram”, nos mester analisa otro factornan y mira con ta haya hende bolbe disfruta di loke centro di Oranjestad ta ofrece y lo por ofrece.


Na Ljubljana, Slovenia, Gobierno a sera casi tur caya den centro di stad pa trafico di auto y truck, y comercio a florece. Kico nan a haci? Ki cambio nos mester trece, ki ambiente nos mester crea, pa haya hendenan bolbe keiro den caya grandi? Ta tempo pa nos cuminsa “think outside the box”. Mi tin entendi cu sr. Randall Croes a presenta un plan na Gobierno. Mi no conoce e plan, pero como e ta bin di un economista Arubiano cu un trayectoria exitoso, e merece consideracion serio.  Ta di spera cu Gobierno lo busca conseho di expertonan pa evalua e plan y public’e pa pueblo tambe por duna su opinion. Huntu nos por logra hopi.