Entrante dialuna awor entrada principal di Hospital ta cambia

Den cuadro di construyendo mihor cuido, dialuna awor Dr. Horacio E. Oduber Hospital ta inaugura un otro parti di e proyecto di renobacion y construccion. E biaha aki ta inaugura e area unda manera drenta lo haya bali di informacion, Departamento di Opname y mas.

Consecuentemente desde dialuna awor, 8 di maart e entrada principal di HOH cu tur hende a conoce pa añanan largo lo ta completamente sera pa publico. Esaki ta nifica cu si bo tin cu bishita hospital pa cualkier servicio di cuido lo mester haci uzo di e entrada nobo na Area A. E entrada aki lo conectabo cu e edificio nobo (Toren A), pero tambe e edificio existente (Toren B).

A traha duro e ultimo lunanan pa finalisa trabounan di renobacion den e area aki. E fase aki di e proyecto ta casi ful cla y poco poco lo muda e diferente departamentonan eyden. A cuminsa muda algun departamento caba n’e area aki cu a wordo ful renoba. Un “look” hopi moderno, un esfera trankilo y suficiente espacio pa por brinda servicio di calidad.

E departamentonan cu desde dialuna awor lo por haya den e area nobo aki ta balie di Informacion/Security, Departamento di Opname, Kassier y Departamento di Facturatie & Debiteuren. Den futuro cercano lo muda mas departamento manera Wondpoli y Functieafdeling.

Lo tin borchinan indicando con pa yega diferente caminda. Si bo tin cu bay Departamento di Radiologia, Botica di Hospital y cafetaria tambe lo mester pasa via e area A completamente renoba pa yega eynan.

Si bo no ta sigur nos tin coleganan cla para pa splica con pa yega e departamento cu bo tin cu bishita.

Cu un espacio hopi mas amplio y mas departamento bao un solo dak e construccion y renobacion ta sigui den bon caminda. Na final di e proyecto grandi aki, Aruba lo tin un Hospital moderno cu lo por brinda mihor cuido y di mas calidad na tur pashent.