Korte ta konfirmá morto di yiu cu a pèrdè den laman

WILLEMSTAD – Un tipo di kaso sivil den Promé Instansia di Korte di Hustisia Komun ku indudablemente sa tin mas biaha den Korte ta kaminda famianan sea yiu of kasá di un persona ku a pèrdè riba laman, ta pidi Korte pa tuma un desishon pa deklará  e persona en kuestion ofisialmente morto.

Un dje kasonan aki t’esun kaminda un kompañero di Nello Craane i un kompañero a pèrdè riba laman dilanti di kosta di Cuba na aña 2013 i ta restonan mortal di Nello Craane só outoridatnan a rekuperá i sobrá informashon tabata deklarashon di dos persona ku a sobrebibi e odisea kaminda 5 hende a pèrdè nan bida.

Nello Craane tabata forma parti di un grupo di homber ku a bai Miami pa bai buska un yate pa trese Kòrsou via Cuba i Santo Domingo, pero dilanti kosa di Cuba e nave a noufragá i nunka mas a tende dje kompañero di Craane, kende tin un yiu muhé na Boneiru, kende ta hañando Penshun di Werfano, pero ku por bira un kaso problemátiko riba kual nos lo bin bèk despues.

E yiu dje kompañero di Craane tin dokumentonan pa respaldá su petishon pa haña un deklarashon di defunshon di morto, pero tin un problema den e kaso i esei ta ku mester atendé ku outoridatnan Cubano ku no te tipo di funshonarionan mas kolaborativo den e materia aki.

Loke tin ta karta di Ministerio di Relashonnan Eksterior di Cuba i Embahada di Reino na Habana ku ta ta indiká ku tata dj e yiu ku mientrastantu tin 31 aña, mester a muri durante e nóufrago dje yate “Broken Vessel Too” (ki kurioso).

E otro kaso ta kaminda abogado mr. Engels na nomber di yiu di un homber ku a disparse probablemente na Shut, tambe ta pidi pa deklaré ofisialmente difuntu.

Den e kaso aki e homber ku a disparse tabata sospecha di a mata su kasá. E homber mes a disparse na Shut dia 4 di januari  2015.

Pa logra e diktamen di Hues, regla di Kódigo Sivil ta bisa ku si ta duda ku un persona ta na bida of a muri su famianan por pidi Hues pa ordená pa konvoká presensia dje desaparesido pa konstatá ku si e ta na bida of laga.

E periodo ku nan ta apliká por lo general ta 5 aña despues ku a mira e persona na bida i promé ku por deklará e persona morto.

Den e kaso di e persona ku a disparsé na Shut, Hues a konvoká p’e presentá, pero esei no a sosode.

Despues di 4 di januari 2015 no tabatin señal di bida mas dje desaparesido.

Testigunan a bisa ku e homber mester a muri pasobra kaminda nan a haña su outo na Shut tin un buraku ku si un hende bula den dje, nunka mas ta hañ’é.

Nan ta sospechá ku e homber a kometé suisidio despues di 2’or di mèrdia di e fecha. Hues a bai di akuerdo ku petishon di e famianan.