Pa su envolvimento den asesinato di Helmin Wiels, George Jamaloodin condena na 30 aña di prizon

WILLEMSTAD – Corte di Apelacion na Corsou a duna su veredicto den e caso di ex politico y ex Minister di Finanza, Jorge Jamaloodin. Un tribunal di 3 Hues a bay di acuerdo cu e peticion haci di parti di Ministerio Publico pa un condena di 30 aña. Den Corte di Prome Instancia a condena Jamaloodin na 23 aña, pero awor e castigo aki a keda aumenta.

Esaki t’e castigo cu Jamaloodin ta ricibi como autor intelectual di e asesinato di e politico Helmin Wiels bek na 2013 conoci como caso Maximus, ademas di a ser declara culpabel di corupcion den e casonan di Passaat y Germanium.

E ekipo di defensa di e ex Minister di Finanza, e prome despues cu Corsou a obtene su autonomia na 2010, a consisti di nada menos cu cinco abogado, encabesa pa profesor Stijn Franken.

Esaki a argumenta cu Wiels tabatin hopi enemigo y cu hopi punto ainda no a keda aclaria dor di e Ministerio Publico den e caso aki. Sinembargo, Fiscal ta sinti cu a demostra e relacion entre Jamaloodin y Nini Fonseca, kende a fungi como intermediario, a traves di SMS entre ambos. E autor material di e asesinato cu a conmociona nos isla ruman, cabando cu bida di lider di partido Pueblo Soberano ta Elvis Kuwas.

Dialuna awor AWEMainta lo bin mas detaya cu e veredicto aki.