Richi Danies tin diferente problema mental

Fiscal no sa kico pa haci cu Richi Danies. E ta hopi preocupa kico e lo haci, principalmente pa cu su mama ora cu e sali liber. Y mas ainda pasobra e no kier acepta ayudo tampoco.  

Richi Danies ta conoci pa su lucha contra actonan di pedofilia. Ultimo el a sinta banda di Parlamento pa mustra su malcontento. El a keda eynan te ora cu a detene durante Toque de Queda cu el a viola diferente biaha.

Corte a trata su caso diabierna mainta, pero e mes no tabata den Corte sino sinta den un sala na KIA y via di Video Call tabata comunica cu Huez y Fiscal. E mes no a papia mucho.

E acusacionnan contra dje ta: Menasa hende cu morto y di a instiga hende contra otro riba 30 di september 2020.

Ademas e ta wordo acusa di a intencionalmente destrui propiedadnan di un banco y di un departamento di Gobierno dia 28 di juli 2015. E ta wordo acusa di pinta riba propiedadnan di un instancia riba 5 di april 2016 y di propiedadnan di un departamento di Gobierno riba 13 di april 2016 y di Warda di Polis na Noord y Santa Cruz riba 2 di mei 2016.

E ta wordo acusa di a viola toque di queda riba 28 y 30 y 31 di augustus y 3 y 4 y 5 y 6 di september 2020.

E ta wordo acusa di a menasa un Polis cu morto dia 3 di juli 2020, dor di bise: “Bay den ***** di bo mama, yiu di ****. No worry, mi sa unda bo ta biba. Mi lo topa bo back riba caya y bo lo wak kico lo pasa cu bo. Bo no ta bay scapa mi. Mi ta bay prepara pa bo. Bo bida ta den peliger”.

E ta wordo acusa di a resisti detencion dor di tres agente policial dia 27 di juli 2020. E ta wordo acusa di publicamente insulta un Polis na pia di su trabao riba e mes fecha aki.

Tambe e ta wordo acusa di a pone un borchi sin permiso di Minister riba caminda publico riba 27 di juli 2020.

Durante tratamento di e caso continuamente e tabata papia cu ta ex Procurador General, Alexander van Dam a bis’e kico pa haci. Pero Fiscal a bis’e cu e no ta kere, pasobra un otro persona presente den e reunion a bisa cu nada di esey ta berdad.

Fiscal a bisa tambe cu e ta kere cu Danies di berdad ta kere cu esey ta loke PG a bise. Psychiatra a bisa cu e ta sufri di un malesa di e tipo aki. E cosnan ta pasa den su mente y ta kere cu berdad hendenan a bis’e cierto cosnan.

Ademas psychiatra a evalua Danies y a yega n’e conclusion cu e no ta totalmente responsabel pa su actonan. E ta sinti su mes e “redder van het vaderland”, e ta sufri di paranoia, caracteristanan psychipatico, etc. Un problema serio. Caracteristica di un hende asina ta cu e no ta acepta su problema tampoco.

Na final Fiscal a bisa cu el a pidi 170 dia di castigo, mas e parti di TdQ cu ta casi 100 dia, e ordo pa e keda leu di cas di su mama, y pa e bay bou guia di Reclassering y Psychiatra. Dia 26 di maart proximo tin sentencia.