Aruba Tourism Authority a reconoce 3 empleado cu a sobresali den 2020

E ekipo di Aruba Tourism Authority ta consisti di un grupo grandi di professional, cu hunto ta traha duro p’asina por cumpli cu e compromiso cu cada un di nos tin cu nos dushi isla. E tempo y dedicacion cu e trabou ta rekeri por ta exigente, pero no obstante esey, e pasion cu e ekipo na Aruba, Merca, Colombia y Hulanda ta desplega ta semper carga pa un compromiso grandi pa traha pa nos pais y pa nos pilar economico, nos turismo!

Aruba Tourism Authority sigur ta aprecia y alabes ta reconoce e esfuerso y determinacion cu cada empleado tin pa cu nan trabou. Den cuadro cu esaki, durante 2019 A.T.A. a inicia un programa di reconocemento anual cu ta hiba e nomber di Hi-Fives/Standing Ovation.

Esaki ta vigente p’e ekipo na Aruba y lo wordo introduci bao ekipo di A.T.A. den exterior. Pues e programa ta uno interno di A.T.A. cual ta permiti tur empleado pa duna reconocimento y merito na nan coleganan pa diferente accionnan cumpli.

E programa di Hi-Fives/Standing Ovation ta mara n’e balornan cu A.T.A. ta haya importante. Anualmente ta saca e ganadornan den un encuentro special cu e ekipo, sinembargo mirando e protocolnan cu e pandemia mundial di Covid-19 a trece cu n’e, e celebracion aki a wordo ahusta p’asina tur miembro di ekipo di A.T.A. por celebra e evento na un manera sano, teniendo cuenta cu tur protocol vigente.

Diabierna mainta dia 5 di maart, tur miembro di ekipo a wordo sorprendi cu un desayuno. Via Zoom a inicia e celebracion, unda CEO di A.T.A. Ronella Croes a hiba palabra di elogio pa tur miembro di ekipo di Oficina di Turismo.

Despues di e acontecimento, a saca e ganadornan pa loke ta trata e programa di reconocimiento.

Despues cu a registra un total di 148 Hi-Fives durante 2020, e ganador absoluto a resulta di ta Sjeidy Dijkhoff-Feliciano, kende a haya mas hopi feedback positivo, compliment y reconocimento for di su coleganan di Aruba Tourism Authority.

Na un manera unico el a wordo sorpresa unda su casa y hiba flor p’e den su oficina y el a ricibi un plakaat for di CEO di Aruba Tourism Authority, Ronella Croes.

Jonathan Boekhoudt t’e di dos persona cu a ricibi hopi feedback positivo durante 2021 for di coleganan y tambe a ricibi su merecido reconocimento. Por cierto, Jonathan tabatin un dia liber y a wordo sorprendi te na su cas unda su coleganan a busk’e y hib’e pa oficina di ATA p’e celebracion aki.

E di 3 persona cu a ricibi reconocimento tabata Josette Croes, kende tambe a ricibi hopi reconocimento di coleganan pa tur su esfuerso y dedicacion cu el a exhibi durante 2020. Di e forma aki, Aruba Tourism Authority ta yuda na percura cu cada empleado por sinti nan mes honra, y na final presta e mihor di nan y alabes ta yuda na engrandece e lace di famia entre empleadonan di A.T.A., cual na final di dia lo refleha den un manera positivo den e trabou, tarea grandi, y compromiso cu Aruba Tourism Authority tin cu nos dushi isla di Aruba. Un pabien y danki di curason na specialmente e tres empleadonan cu a sobresali den 2020!