Ban sigui educa y siña nos mucha y hobennan cu igualdad den oportunidad ta algo cu nos tur merece

Awe riba Dia Internacional di Hende Muher nos mester refleha riba e desaroyo y progreso inmenso cu nos isla a logra riba tereno di igualdad di genero.

“Siendo un hende muher, representando mi pueblo como Parlamentario, realisando mi soñonan, mi ta sinti mi bendiciona di a lanta den un comunidad cu a brinda mi e oportunidad ey”, Shailiny Tromp-Lee a cuminsa su mensahe p’awe.

Lamentablemente esaki no t’e caso pa tur di nos. Pesey mes nos mester sigui pone enfasis riba meta number 5 di Desaroyo Sostenibel di Nacionnan Uni. Un meta cu ta enfoka riba e igualdad di genero, empoderando nos sernan femenino.

E ta importante pa pasa e mensahe aki cada oportunidad cu nos haya.  Ban sigui educa y siña nos mucha y hobennan cu igualdad den oportunidad ta algo cu nos tur merece.

“Como hende muher mi tambe ta sostene e tema di e aña aki cu ta #ChooseToChallange. 

Pesey mes mi kier reta tur hende muher pa: Sostene y motiva otro, pa berdaderamente aporta na desaroyo y crecemento di otro hende muher. Mas cu tur cos ban percura pa bira fuente di inspiracion pa futuro generacion.  Feliz Día di Hende Muhe. Ban sinti nos mes orgoyuso di por celebra e hende muher, e persona cu un curason fuerte y amor infinito”, Parlametario Shailiny Tromp-Lee a finalisa su mensahe.