Hende muher ta indispensable den creacion y formacion di bida

Bida di tur hende riba e mundo aki, ta creacion di nos Señor, pero tambe nos bida, di cada individuo, ta depende di e hende muher cu ta pone nos riba e mundo aki.

Un reconocimento cu simplemente no tin nada pa iguala y ta algo cu pa siglo y siglonan, a wordo neglisha, a wordo tuma como algo normal cu e hende muher tin cu haci y hasta a limita e hende unico aki, den loke e por y loke e no por den un mundo domina pa demasiado tempo pa un pensamento machista.

No tin nada mas bunita y milagroso ora un hende muher sali na estado, caminda den su bariga un otro bida di un ser humano ta formando y creciendo, algo asina bunita, algun asina grandioso cu nos conoce como yiu.

Sinembargo pa demasiado tempo poco tabata esnan cu a cuminsa duna reconocimento p’e acto milagroso aki, un acto asina bunita y na hopi ocasion sin wordo aprecia.

E hende muher ta special, hopi special y nan por cosnan den bida cu e hende homber nunca por pensa di por haci, caminda hopi di e damanan aki ta mustra mas curashi cu cualkier ser masculino corona cu musculonan rondo.

Un parti ta algo bunita, algo milagroso, pero na mes momento e ta mustra e curashi y forsa mental di e hende muher cu por transforma su curpa di e forma aki pa despues recupera su figura bek pa sigui cria e bunita ser humano cu e mes a duna nos.

Pa demasiado tempo e hende muher no a wordo balora manera cu nan tin derecho di balora y hasta riba e dia special aki, ainda den varios skina di mundo e hende muher ta wordo mira como un ser inferior, un ser cu no tin derecho, un ser cu por wordo manipula manera cu por y ki ora cu por.

Sinembargo ta alendtado pa mira cu den ultimo añanan e hende muher a cuminsa lanta para, a cuminsa mustra un curashi enorme, un caracter fuerte y determinante, un hende fuerte mentalmente y mas ainda un hende cu tin solucionnan practico pa influencia y cambia bida di tur hende rond di nan.

Rond mundo, sigur mas den paisnan desaroya y moderno, e figura di e ser femenino a cuminsa laga nan stempel atras, creando cosnan positivo y constructivo den progreso di nan pais, den progreso di nan institucion, den formacion di nan famia.

Mas y mas ta mira lidernan di paisnan wordo eligi for di e grupo di damanan hopi capacita, cu hopi mas creatividad y cu mucho mas solucion practica pa cualkier problema cu nan tin cu enfrenta.

E ser femenino di awendia, ta kibrando cu bareranan di descriminacion di demasiado tempo, no cu forsa of un lucha violento, pero cu e arma di capacidad, di conocemento y mas cu tur cos cu e arma di compasion cu e hende muher tin mas cu e hende homber.

Awe nos ta celebrando Dia Internacional di Hende Muhe, caminda no ta den tur pais esaki ta posibel pero rond di nos por mira un tipo di revolucion tumando lugar, caminda e hende muher su presencia mas y mas ta detereminante den solucion di problemanan.

Como lider di un pais, como lider di un organisacion, como lider di cualkier instancia, e hende muher lo keda e simbolo di un Mama di su yiunan, un miembro di un famia cu el a crea un forma, loke ta duna un bentaha mucho mas riba e ser masculino.

Ta momento tambe pa felicita tur Hende Muher awe na Aruba, gradiciendo boso tur sin excepcion, e rol grandi cu boso tur a hunga na un momento of otro, den bida di cualkier individuo, sea como mama of ruman, como tanta of hefe, como bisiña of como casa, semper cu e simplicidad cu por ser mira solamente den curason di e hende muher, cu no ta busca solucion violento, pero mas tanto solucionnan respetuoso.