Korte Supremo a nenga peticion di banco lokal contra Fondo

WILLEMSTAD – Diabierne mainta Korte Supremo na Hulanda a rechasá e apelashon ku Banco di Caribe a hasi kontra un desishon di Korte di Hustisia kaminda a kondená e banko lokal pa paga Fondo Partikular Parasasa un suma di dos mion i piku florin den un demanda ku Cortenan lokal a bin ta trata for di 2013 bin ariba.

E ultimo rekurso ku a keda Banco di Caribe ta pidi Korte despues di e veredikto di Korte di Hustisia Komun tabata pa apelá na Korte Supremo, pero Abogado General mr. T. Hartlief dje tribunal maksimo a rechasá e kaso pa falta di mérito.

Esensia dje kaso ta ku na 2006 e Fondo Partikular ku ta un instrumento ku hende ku hopi kapital ta uza pa manehá nan kapital pa sea invershon of dia nan baha ku penshun den futuro, a kumpra e tereno na Piscadera pa traha apartamento i bende esakinan.

Banco di Caribe a duna e Fundashon un kredito di NAf 1.849.660,– i mas despues un kredito adishonal di NAf 650.000,– a kambio di derecho komo promé hipoteka komo garantia.

Komo ku un fundashon  no mag funshoná komo negoshi, notario De Vries a bin ku e solushon pa pasa un kompania anonimo di kual e fundashon tin tur akshon.

Ademas e notario a rekomendá pa parti e inmobilario den 18 apartamento, pero Banco di Caribe mester a duna su cooperashon pa pasa e akta.

Un ke otro no a bay manera a planiá i Corte a disidi ku e banko no a reakshoná manera debe ser  riba petishon dje fundashon i a ordená pa banko paga e fundashon e daño finansiero ku nan a sufri.

Summa summarum: E proyekto di apartamento a bay den su skietpat. E fundashon a kuminsa un kaso kontra banko pidiendo un daño perwisio di NAf 11.119.505,–  pero Hues a limitá e suma na NAf 2.260.000,–.

Den Korte di Hustisia Komun, nan a konfirmá e promé veredikto ounke abogado dje banko a argumentá ku sino ku nan a hasi e fout, e proyekto lo a frakasá di tur manera pero Hues a rechasá e teoria aki.

Loke banko mester a hasi ta reakshona adekuado riba e sugerensianan di notario De vries. I esei no a sosode, e ta keda anula.

A PASA 10 AÑA

Abogado General na Korte Supremo a konstatá ku a pasa dies aña, pero si Banco di Caribe a koperá adekuadamente ku e plan di reskate di OBNA i a slèk un tiki mas sèn, lo a kaba di traha e apartamentonan rapidamente te bende nan.

I esei lo a trese kune ku e fundashon lo a kaba di banko for di 30 di yuni 2009.

Konklushon di Abogado General na Korte Supremo tabata ku e petishon di Banco di Caribe no por resultá den un tratamentu nobo i a rechasá e petishon indikando ku Korte di Hustisia Komun na Kòrsou tin ku kaba di atendé e formalidatnan.

Ademas e tribunal supremo a kondená e fundashon pa paga e gastunan dje tratamentu.