Mayoria di pueblo Arubano 90% ta di Fe Cristian

Pa: Eric Ras di CURPA

Dialuna 1 maart 2021 tabata un dia scur pa pueblo Cristian aki na Aruba. Despues dia 8 di september 2016 e ley di nos codigo civil a wordo trata den nos Parlamento  y a keda pa casi 5 aña den lachi. Nos por corda cu e amienda a wordo saca for di bari sushi treci bek riba mesa. E tempo ey den tur skina aki na Aruba e tabata tema di dia.

Den e pueblo di Santa Cruz tabatin un consternacion grandi mey-mey di e pueblo di Dios. Nan a wordo primiti cu e ley aki nunca lo mira luz di dia. Pa Nacionnan Uni e ley aki ta keda na cada pais pa dicidi y no ta un derecho legal. Tin un sentencia cu ta papia cla di esaki. No laga ningun politico gañabo paso e ley aki diferente.

E tin mesun derecho cu matrimonio y e unico cos cu ta haci e diferencia t’e palabra “geregistreerde partnerschap”. Nos ta papia masha superficial di e ley aki, pero su enbergadura ta grandi. Esaki t’e cuminsamento. Aruba su poblacion ta consisti di gran parti di Fe Cristian. Nos por papia di mas o menos 90% di pueblo di Aruba ta di Fe Cristian. Awe bo por sinti e dolor den e pueblo Cristian cu no a haya respet pa nan opinion y cu e palabra di Dios no ta conta.

Nos Parlamento a bira lomba pa Dios. Ora un pais bira lomba pa Dios, Dios lo bira lomba p’e pais. E bendicion ta cuminsa di riba bin abao.  Nos Parlamento t’e organo mas halto di nos constitucion.

Principio di sabiduria ta temor di Dios, pero nos ta mira un Parlamento cu no tin temor di Dios y no ta tene cuenta cu principionan di Dios cu ta sagrado. Parlamento no ta kere mas den un Dios bibo. E bon di esaki ta cu Dios conoce curason di cada un di nos cu biba riba e isla aki. Dios no mester ningun hende pa defende paso E ta soberano. 

Na mi opinion e Parlamentarionan Tevreden y Guedez por a haci mas p’e mayoria di pueblo di Aruba cu nan fe ta den Dios si nan a tuma un postura hopi mas firme. Nan por a bay mas leu cu djies di vota contra di e invoeringsverordening p’asina e codigo civil no wordo aproba. A keda demostra e linea di partido tin mas balor cu e palabra di Dios.

Awor aki ta laat y esaki nan mes mester analisa pasobra nan tabata den e posicion pa e ley aki no a bira realidad.  E 17 Parlamentario a vota pro apesar di a wordo poni debidamente na altura di e consecuencianan a dicidi pa bay contra di e palabra di Dios. Nan no a kies p’e bendicion y e pueblo. Partido AVP cu tabatin un idologia Cristian a bay contra su propio ideologia un biaha mas. E tambe a bay contra principionan di Dios y nan lo no por spera bendicion pa traiciona e principionan di Dios.

E 17 Parlamentarionan aki simpelmente a stroba e bendicion y prosperidad di pueblo di Aruba. E hendenan aki no mester regresa nunca mas como Parlamentario di pueblo di Aruba.  Partido CURPA tabata e unico partido politico cu a para pa principio di Dios y cu lo sigui para pe. Esaki ta refleha con dividi e pueblo Cristian ta y a vota pa tradicion. Si e Cristiannan tabata uni e pueblo Cristian lo tabatin su representante den nos Parlamento pa sirbi interes en general di e pueblo y no interes di e partido cu nan ta afilia na dje. Nos postura lo refleha den principionan di Dios y no di partido. Mirando cu e mayoria di e pueblo di Aruba ta Cristian. Nos no por tira culpa riba ningun hende. Nos mester mira e balki den nos propio wowo. Nada no ta pasa pa casualidad y Dios ta permiti cosnan aki sosode pa nos por habri nos wowonan y drecha nos fayonan.  Si nos kier haci e diferencia nos mester uni. Nos a cay pasobra nos tabata dividi y e ta bisto. Den union nos tin forsa. Si nos kier pa nan respeta nos como pueblo Cristian, nos mester uni.  Asina so nan lo tene cuenta cu nos opinion. Nos  opinion tambe ta conta y respeta nos. Mi ta haci un apelacion na pueblo Cristian di nos Aruba dushi tera pa uni cu partido CURPA p’asina nos haci e diferencia den e proximo eleccion. Pa gana e minoria nan lo perde e minoria.