Razzia den Koningstraat a produci 11 detencion

Den un razzia Project Team Drugspanden a confisca droga, placa cash y a detene 11 persona.

Project Team Drugspanden ta un team cu a wordo lanta pa investiga bendedornan di droga mihor bisa na Hulandes“straatverkoop”. 

Diabierne ultimo di un razzia a detene e 6 prome personanan cu ta cumprador di droga. Conhuntamente cu Ministerio Publico y Hues Comisario a haci un entrada hudicial na un cas situa den Koningstraat. Aki e team a detene den total di 5 persona: 3 hende homber di cual nan inicial ta: K.Y.N. di 21 aña naci na Colombia, C.S.N. di 58 aña naci na Colombia, L.A.S.I. di 40 aña naci na Venezuela.

2 Hende muher di cual nan inicial ta: M.F.G. di 58 aña naci na Colombia y L.S.C. di 37 aña naci na Venezuela.

Durante e entrada hudicial a confisca marihuana, cocaina y un suma di casi 5000 florin. Diferente team special manera: K9-unit, Departamento Tecnico di Cuerpo Policial y otro teamnan tambe a participa n’e entrada hudicial aki.

Pa Cuerpo Policial por resolve mas caso, cooperacion y informacion di pueblo di Aruba ta hopi importante, pesey KPA ta pidi si bo tin cualkier informacion yama nan tiplijn: 11141. Nos ta garantisa cu bo ta keda anonimo.