Sektor di casino Online a sufri gòlpi doloroso!

WILLEMSTAD – Di akuerdo ku un archivo ku sitio digital Koninkrijksrelaties a lansa e siman aki, sektor di casino on-line na Kòrsou a sufri un gòlpi doloroso ora ku direktor i doño di un Trustkantoor a keha abogado Bijkerk i no a haña rason, pero mas bien a haña un amonestashon p’e forma iregular i hasta ilegal ku su klientenan ta traha usando Kòrsou komo base.

“Curaçao, world capital of online gambling”, ta un dje titularnan ku e outor a menshoná den su informe riba estado di wega di plaka digital na i for di Kòrsou.

Den un intento pa sera boka di e abogado ku ta krítiko riba sektor di casino online na Korsou i ku ta konosi tambe komo “gokmafia” serka sierto politikonan Hulandes p’e práktikanan ilegal, direktor dje trustkantoor Humberto d’Abreu de Paulo a komete un vupá di primera orden ku Bijkerk a kastigá mesora.

Asina a sali  na kla durante un kaso den Corte ku Bijkerk a start kontra e empresa di d’Abreu de Paulo, Gaming Services Provider N.V.

Abogado Bijkerk ta aktuando na nomber di Stichting Belangenbehartiging Gedupeerden Online Kansspelen.

KASTIGABEL

Den e kaso ei e abogado a trese dilanti ku trustkantoor GSP a kometé delito i a faya ku lei dor di keda sin verifika identidat di hungadórnan di wega di plaka internashonal i lokal den e casinonan online ku ta operá bou di ouspisio di GSP.

E regla ei ta obligatorio pa delitonan di evita labamentu di plaka i finansiamentu di terorismo riba kual tin 4 aña di kastigu.

Bijkerk a argumentá ku sektor di casino ta violá  e lei masalmente i p’esei el a entrega keho penal.

D’Abreu de Paulo di su parti ta haña ku e abogado a ekspresá su mes inesesariamente abusivo i denigrante kontra su persona i asina a violá e Kódigo di Etika di abogadonan i a entrega un keho serka Komishon di Disciplina di abogasia lokal.

Den su veredikto e komishon ku ta konsisti di e huristanan profeshonal mr. N.M. Martinez, mr. S.E. Thomsom i Mr. Hammoud, nan a splika ku abogadonan profeshonal tin un margen grandi di libertat pa defende interes di nan klientenan, pero e libertat aki no ta ilimitá, pasobra e tin su frontera i freno.

Un dje reglanan ta ku un abogado no mag kalifiká un hende inesesariamente ofensivo i denigrante.

E komishon a bisa ku  nan ta kompronde ku e empresario a sinti e palabranan di Bijkerk komo ofensivo i denigrante, pero ku esei e no a violá e limite di komportashon profeshonal aseptabel.

Ademas Bijkerk no a usa argumentonan ku e tabata sa ku nan no ta korekto of ku e por a sa ku nan ta inkorekto.

D’Abreu a akusá Bijkerk ku su intenshon tabata pa kousa daño na su empresa i su persona, pero e komishon disiplinario a  rechasa esaki tambe.

Nan a rechasa e argumento dje empresario ku e akusashonnan dje abogado no tin pia pa para’riba pasobra Roelof Bijkerk a fundamentá su akusashon ku dokumentonan veridiko.

Konsiderando loke a pasa, Roelof Bijkerk no a aktua ofensivo te ku mester sanshoné pa un eventual fayo di regla di étika. E Comision di Disciplina a haña ku e denunsia di d’Abreu de Paulo  no tin base.