Surinam Independiente a pidi Hulandes pa manehá SLM!

SCHIPHOL – Un algu ku no tin nada di haber ku e tema di aviacion, pero ku nos tin ta tende masha aña i no mas ayera atrobe for di boka dje Minister di Salubridat mas malu ku Kòrsou a konosé den su historia ku “…Nos mes por…” i ku tin nos pais 100% den su skietpat a keda desbaratá un biaha mas, pero e biaha aki na Surinam ku ta un paso mas dilanti ku nos den kampo di independensia.

Surinam tin algu mas ku 25 aña ku e pais a bira independiente i frankamente bisá e ta un káos total. E káos ta hasta tal grado ku e kompania nashonal di aviashon a yega den e fase ku nan no tin avion pa nan rutanan internashonal, pasobra nan a hunga wega di Monopoly ku e kompania i awor a pidi un Hulandes pa bin manehá e kompania.

Despues di independensia Gobiernunan di Surinam a kore ku práktikamente tur Hulandes, pero awor a ripará ku nan mes no por manehá e pais i sigur no nan kompania nashonal di aviashon te ku nan mester buska Hulandes pa hasi esei pa nan.

Es más, Merikanonan a mira un buraku den merkado i pronto American Airlines lo kuminsa bula dos biaha pa siman entre Miami i Paramaribo, pasobra biahero tin: Ta avion nan no tin!

Paul de Haan te homber Hulandes ku Gobiernu di Surinam ke nombra komo Direktor di Surinam Airways (SLM) di akuerdo ku varios kanal di informashon na Surinam i na Hulanda.

Paul de Haan mester saka e kompania ku ta halando pa muri for di kaha di morto. Ultimo 12 aña De Haan a traha pa Kenya Airways i promé ku esei pa KLM.

Foi decèmber aña pasá e ta dirigi e gerensia interino di Surinam Airways i otro siman lo anunsia su nombramentu ofisialmente.

SURINAM AIRWAYS

Ta masha tempu kaba Surinam Airways ta rotsoi i no por ta otro palabra Gobiernu ta doño dje kompania ku ta pèrdè plaka manera awa.

Un dje gòlpinan finansiero mas grandi ku e kompania a sufri ultimo añanan ta despues ku nan a alkilá un Airbus A340 di kuater motor i pa kolmo basta bieu ku a duna nan masha doló di kabes i despues un Boeing 777. Aparentemente nunka e Boeing 777 no a hasi un buelo komersial, pero mester paga su alkiler tur luna. Kompetensia ku ta hole sanger ta preparando pa bula den e rutanan ku SLM tabatin pa Trinidad, Amsterdam i Brazil.