“Tin diferente factor ta hunga un rol pakico hende muher no a integra facilmente den e sector laboral”

No ta un secreto cu hende muher den e forsa laboral y den posicionnan halto di maneho y liderazgo no ta cos di tur tempo. Realidad awe ta cu hende muher a introduci su mes poco poco mas den e forsa laboral durante transcurso di tempo y aki na Aruba no ta diferente.

Tin hasta estudionan haci cu ta observa e diferencia y e desaroyo den esaki. Na 2006 “The World Economic Forum” a introduci hasta “The Global Gender Gap Index” cu ta indicenan pa observa e gap di diferente factor hacienda comparacion entre hende homber y hende muher. Factornan manera educacion, salud, participacion y oportunidad economico y poder politico.

Segun Setty Christiaans Yarzagaray di MEP, tin diferente factor y obstaculo ta hunga un rol pakico hende muher no a integra facilmente den e sector laboral, bay studia y cumpli cu deseonan ambicioso di ocupa posicionnan halto den comunidad y den politica.

Mayoria parti un aspecto cu no ta haci’e facil ta famia, pa haya un bon balanse entre trabou, famia y responsabilidadnan domestico. Mirando cu e hende muher lo tin deseo di forma su propio famia, organisa su bida familiar, por ta yuda cu cuido di nos grandinan di nos famia ta haci e hende muher su tareanan hopi pisa pa combina cu trabou y mas ainda den posicionnan importante di responsabilidad, di liderazgo y den politica. 

Reflexionando riba Dia di Hende Muher, como un di e temanan di e dia aki pa 2021, Setty Christiaans Yarzagaray ta reta hende muhernan pa ban amplia nos posibilidadnan mas, sostene otro hende muhernan den posicionnan clave y pa nos ta mihor representa den politica! Pakico?

Pasobra nos hende muhernan ta 52% di poblacion di Aruba y sin bo nunca nos lo yega na igualdad!

Feliz dia di hende muher!