Investigacion grandi na Hulanda a inicia riba complicacionnan medico pa falta di atencion necesario dor di Covid 19

AWEMainta na varios ocasion a mustra riba e situacion medico cu a surgi dor di e pandemia di corona virus y con esaki ta afectando mucho mas hende pa un falta di atencion adecuado y profundo.

Den un articulo anteriormente, a keda publica e falta di atencion medico produndo y amplio pa hendenan cu ta malo pa cierto asunto, pero kendenan no por haya atencion medico necesario, loke por conduci na un problemanan mucho mas serio y cu por a wordo evita.

Dor di e pandemia, trato adecuado y necesario den hospital, no solamente na Aruba, pero rond mundo, cuido medico a cay den un sistema di ‘sinta warda’ ya cu tur hende tabatin medio di wordo infecta cu e corona virus, loke a crea situacionnan preocupante pa pashentnan cu si nan a haya atencion adecuado y na tempo pa un of otro problema di salud, nan lo no a bira mas malo y hasta varios a muri p’e falta di atencion medico mas profundo.

E falta di atencion aki a pone cu hendenan cu tabata mal di cosnan menos serio, a mira con nan situacion a sigui bay atras pa falta di atencion medico adecuado y cu despues lo conduci tog na mas gasto p’e sector medico.

Na Hulanda e preocupacion aki ta grandi for di algun luna caba, pero ayera dialuna a inicia un investigacion profundo riba petico di ‘Patientenfederatie Nederland’ riba cuanto hende a wordo perhudica y a bira mas malo ainda, pa motibo cu nan no por a haya tratamento inicialmente.

Diande Veldman, kende ta Director di Brabantse Elizabeth-TweeSteden Ziekenhuis caminda den ultimo 12 luna, a keda registra 68 caso di complicacionnan serio pa falta di cuido medico na momento cu esaki tabata necesario.

Dor di henter e desaroyo cu pashentnan di corona virus, atencion medio pa otro pashentnan a bira masha limita y hendenan cu mester tabata interna pa sigui un proceso medico normal, a wordo manda cas pa evita contagio cu e corona virus.

E maneho aki a pone cu hendenan cu tabatin un malestar  liviano, a bin confronta complicacionnan serio y den varios caso hasta a perde nan bida pa motibo cu e tratamento medico inicial, no tabata disponibel.

Di e grupo di 68 pashent menciona, autoridadnan ta kere cu sigur 7 di nan a perde nan bida pa falta di e atencion medico  y mayoria di e casonan aki tin di haber cu casonan di cancer, problema di curason, problemanan serio di wowo y  nekhernia caminda pa falta di atencion normal, tur e casonan aki a complica y bira algo mas serio.

Manera AWEMainta a yega di publica cu tin specialistanan Hulandes cu ta kere cu e pandemia aki lo bay costa bida di mucho mas hende cu nan ta spera, mucho mas cu e caso di e corona virus mes lo ocasiona, pa falta di atencion na tempo y maneho di un of otro malesa na tempo.

E federacion di pashentnan na Hulanda ta spera cu mas hospital lo participa den e investigacion aki p’asina haya un bista mas real di e daño causa na hendenan cu malesanan normal, cu a wordo empeora p’e falta di atencion necesario inicial.

No solamente ta kere cu lo tin mucho mas pashent cu a wordo perhudica p’e falta di cuido, pero tambe cu lo tin mucho mas hende cu a fayece pa falta di e atencion aki.

ARUBA

Ora cu lesa di e cifranan aki, ta lanta e pregunta ta con e situacion lo bay ta dentro di algun luna, sigur awor cu Gabinete Wever Croes a bay di acuerdo cu Hulanda, pa baha gasto den cuido medico cu 60 miyon florin pa aña, loke sin duda lo bay tin su consecuencianan.

No solamente e pandemia ta causando mesun problema aki na Aruba, caminda ta manda pashentnan cas pa cura, mientras cu nan ta rekeri atencion mucho mas profundo den hospital,  pero tambe awor cuido medico tin di haber cu reduccion di  gastonan pa un suma asina halto di 60 miyon, cu ta 5 miyon pa luna, cu sin duda tambe lo tin su efecto devastador pa henter comunidad.