Kontratista no por kobra € 1.3 mion sino e ta ruina finansa di St. Maarten

WILLEMSTAD – Den fin di siman pasá mr. C.T.M. Luijks den su kapasidat di Hues di huisio sumario den e kaso di un kontratista kontra Gobiernu di Sint Maarten, a duna e kontratista rason riba kasi tur punto di su demanda pero no a outoris’é pa kobra Gobiernu di e pais outónomo.

Esei simplemente pasobra si e presentá un kuenta pa daño i perwisio pa trabou ku e kontratista Van Boekel Bouw N.V. a traha, e lo  ruina finansa dje pais.

Gobiernu di e isla no a reservá e plaka ningun kaminda simplemente pasobra nan no tin fondo.

E wes a konsedé ku Van Boekel tin e derecho pa kobra pasobra nan a hasi e trabou pero mesora a rechasá pago dje suma di € 1.3 mion ounke ku e reklamo ta aseptabel.

Dia 26 di yanuari ultimo e kontratista Hulandes Van Boekel a entrega e demanda den Korte pa e proyekto di konstrukshon di riolering  den Dutch Quarter Sewerage.

Na diferente okashon Van Boekel a para e trabou, un biaha kaba pa 4 luna pa falta di kumplimentu di Gobiernu.

Juli aña pasá Van Boekel a bolbe para e trabou te awe.

Gobiernu a kontratá Van Boekel pa hasi e proyekto pa € 4.287.680,00. Union Europeo ta finansiá e proyekto pa Gobiernu.

Ora Van Boekel manda faktura Gobiernu mester paga nan den 90 dia i nan mester a kaba trabou den 90 dia. Esei no a sosode naturalmente i te awe e dos partidonan no yega na akuerdo riba e suma.

Gobiernu a splika e kompania ku e fondonan di Union Europeo no a drenta i Van Boekel a ofresé pa Gobiernu pa nan na kuota  di 14.562 pa siman.

FALTA DI COVID!!

Dado momento Gobiernu a rekonosé ku nan a faya, pero a skonde tras di ‘force majeure’ en relashon ku pandemia di Covid  19.

Entre tantu e trabou ya ta tres aña atrasá i durante un reunion pa resolvé e problema a duna Ministerio di Finansa òrdu pa paga mesora.

DESISHON DI HUES

Den su evaluashon dje konflikto, wes a disidi ku su ròl den e drama a kaba i ku e dos partidonan tin ku sinta na mesa resolvé nan koroto riba nan mes.

Manera kos ta pinta e proyekto lo ta kla na september proksimo i mientras tantu habitantenan di Dutch Quarter tin ku sigi soportá un sistema di riolering defisiente.