KvK a reuni cu Standard & Poor’s encuanto desaroyo financiero y economico

Recientemente, Camara di Comercio y Industria Aruba (KvK) a tene un reunion cu e compania di rating Standard and Poor’s (S&P) pa delibera riba desaroyo financiero y economico.

E biaha aki, debi n’e pandemia, S&P no tabata fisicamenta presente, pero nan a reuni cu tur instancia importante via reunionnan digital, pa nan por haci un evaluacion debido di Aruba.

Na april 2020, na cuminsamento di e crisis causa p’e pandemia di Covid-19, S&P a revisa e rating di Aruba su sistema economico y financiero di stabiel pa negativo. E bon noticia tabata cu Aruba a keda mantene su investment rating di BBB+.

S&P a pronostica cu den e pandemia aki Aruba lo ta n’e prome lugar di paisnan cu ta depende di turismo y cu lo keda afecta p’e crisis di Covid-19.

Esey tabata e motibo principal cu e biaha aki e evaluacion financiero y economico di Aruba a concentra riba e impacto di Covid-19 pa Aruba.

CBA a calcula cu Aruba su economia (GDP real) a cay cu 26.4% den 2020 debi n’e crisis economico causa p’e pandemia. Pa aña 2021 ta premira cu economia lo crece cu 5.2% si nos turismo recupera.

KvK a combersa cu S&P tocante puntonan cardinal pa fortalece nos economia y pa por garantisa e stabilidad y seguridad economico y social di henter e comunidad di Aruba. Temanan cu a wordo discuti tabata entro otro puntonan cu ta figura den e “Landspakket” Aruba.

S&P ta considera e acuerdo cu Hulanda como un guia sumamente importante pa nos Pais, pa cu e decisionnan cu wordo tuma mester conduci na reformanan fiscal, economico, financiero, social y institucional.

KvK a enfatisa tambe cu flexibilisacion di e leynan laboral ta esencial pa facilita un pronto recuperacion economico. Un dunador di trabou mester tin e flexibilidad di por tuma un empleado den servicio pa un tempo limita y renobabel. Ademas KvK ta boga pa dunador di trabou wordo permiti di laga e trahadornan traha dianan y/o orarionan reduci.

Un otro punto cu ta sumamente importante p’e evaluacion di S&P t’e hecho cu Aruba a yega na un acuerdo cu Hulanda pa haya yudansa financiero den forma di fiansa cu ta condiciona na reformanan structural, incorpora den e Landspakket.

E yudansa financiero, den forma di FASE, sosten financiero pa empresa chikito y mediano, y subisidio di salario  ta wordo considera esencial pa por stabilisa e situacion financiero y economico.

KvK ta agradecido pa e oportunidad cu S&P a duna pa por dialoga, y KvK ta confía cu e dialogo ta contribui na un evaluacion corecto, honesto y balansa.