Minister no ta duna cu certitud cu presupeusto 2021 lo yega Parlamento e luna aki

Nada ta sigur ainda y si analisa loke Minister di Finansa Xiomara Maduro a declara, presupuesto 2021 lo no yega luna di maart tampoco Parlamento pa wordo trata, ya cu ainda tin adaptacion pa haci n’esaki.

Mientras cu Minister Maduro no a bay den profundo kico ta pasando, ta un hecho cu no ta solamente riba consehonan di Raad van Advies ta sperando pa haci adaptacionnan necesario, pero esun mas importante ta loke ta observacionnan di CFT, e Comision di Supervision Financiero cu ya caba a menciona varios punto cu Gabinete Wever Croes no ta teniendo su mes na dje.

Ta keda un problema serio e forma con Gabinete Wever Croes kier baha gasto di personal, gasto di maneho cu segun CFT recientemente, no ta bahando manera cu a wordo palabra.

Tin cierto punto cu Comision di Supervison a elogia manera e decision di Gabinete Wever Croes pa reduci cuido medico cu 5 miyon pa luna pa un total di 60 miyon pa aña y esaki mientras cu Gobierno a sigura partido y gremionan, cu e lo duna participacion na tur instancia pa yega na un solucion pa reduci gastonan di cuido medico.

Sinembargo CFT ya caba a mustra cu e reduccion di gasto aki ta un pensamento di Gabinete Wever Croes y cual tambe ta algo concreto, e ta un hecho, ya cu Prome Minister a firma e acuerdo cu Hulanda caba.

Esaki ta mesun cos cu e asunto di cambio di ley di LTU, caminda cu Hulanda ya a oficialisa un cambio di ley for di dia prome di februari manera palabra cu Prome Minister Evelyn Wever Croes, pa despues bin Parlamento ora cu tur cos ta ‘kant en klaar’ pa haci e formalidad cu e  cambio di ley a yega Parlamento.

Ta Hulanda ta dicidi loke ta pasando, of mihor bisa ta Hulanda cu yudansa di Prome Minister ta ehecutando acuerdonan cu nan dos a sera y esaki a converti Parlamento di nos pais, den un tipo di cas di comedia caminda legisladornan por sinta delibera riba cierto cos, pero na final di dia ta Gobierno Hulandes ta mira kico por y kico no por.

Mesun cos aki cu e presupuesto 2021, caminda for di algun tempo caba tin confrontacion entre Gabinete Wever Croes y CFT cu kier mira y ta insisti pa cierto cos wordo cambia, entre otro tin cu elimina un decision di Gobierno di Aruba riba loke ta reduccion di Loonbelasting cual decision awor Gabinete Wever Croes tin cu hala bek aden ya cu no por duna cu claridad for di unda lo saca e placa aki e ora.

Tanto den luna di december di 2020 como luna di januari di 2021, Minister di Finansa Xiomara Maduro a sigura cu presupuesto 2021 lo ta na Parlamento segun palabracion cu Gobierno di Hulanda, loke no a sosode  ningun momento.

Awor un biaha mas mesun Minister di Finansa Maduro ta haci un declaracion sigurando cu e mesun presupuesto 2021 lo yega Parlamento e luna aki ainda.

Sinembargo na mes momento Minister ta papia riba cuentanan anual di companianan estatal y fundacionnan cu ta wordo subsidia pa Gobierno, no ta cla cu nan cuentanan anual y cu lo investiga kico a pasa, pero en realidad ta Gobierno su responsabilidad pa exigi di e instancianan aki, pa nan tin nan cuenta anual regla y bon hinca den otro. Un Gobierno cu no ta na altura cu su companianan estatal no tin nan cuenta anual regla, ta confirma cu su maneho financiero falta masha hopi seriedad pa por hiba un maneho financiero adecuado.