Partido POR acercando hopi posibel candidato pa forma lista nobo pa campaña

Despues di wordo nombra como lider nobo di partido POR,  sr. Alan Howell a inicia cu e proceso pa sera un partido practicamente nobo, cuminsando for di ‘fundeshi’ p’asina cuminsa cu e proceso di trata di iguala resultado cu e partido a logra den su prome eleccion na 2017.

Ainda no tin mucho claridad riba e desaroyonan, pero ya caba pa di dos siman sigui, lider Alan Howell a bin ta reuniendo cu difirente posibel candidato caminda mas tanto a pidi tur cu nan a cerca, pa por a tuma un decision diabierna ultimo 5 di maart, pero no ta tur di e candidatonan aki, lo a keda cla pa duna un contesta definitivo n’e lider di partido.

Tog tin varios candidato cu tabata riba lista na 2017 a mustra deseo pa sigui riba lista di e partido, pero ainda falta varios asunto pa aclaria pa mira den ki direccion e partido lo ta moviendo.

POR a logra un asiento den ultimo eleccion y a logra un restzetel cu a duna e partido dos asiento, cu ta leu di e expectativa cu tabatin p’e ex fundador y ex lider Otmar Oduber, kende a pronostico cu sin duda POR lo a saca cinco asiento den e proceso electoral di 2017.

Lider Howell a papia cu varios  figura den Cuerpo Policial, pero no a logra convence esnan cu tabata kier, pa nan drenta den politica mirando e panorama cu tin n’e momentonan aki cu henter e pais.

Kende lo ta riba lista como number dos tras di Howell tampoco tin un decision ainda, pero den fin di siman reunionnan a sigui riba formacion di e lista y tambe riba un posibel programa di gobernacion cu e partido tin cu presente dentro di algun siman na pueblo.

Te ainda Minister Andin Bikker no a confirma si e lo ta sigui den politica of di e lo retira, pero manera cu e dianan ta pasando asina liher, hopi ta kere cu Bikker lo no bay eleccion na luna di september benidero.

Pues e prome tres puestonan cu a mustra asina fuerte pa partido POR den e eleccion pasa, cu ta Otmar Oduber como lider, Andin Bikker como number dos y Marisol Lopez Tromp como number tres, ya no ta existi mas y ta keda na lider Howell pa busca candidatonan cu por trek hopi votador y yuda e partido gana e tereno perdi aki bek.

Tampoco ta conoci si e ex fundador y lider Otmar Oduber lo bay yuda e partido durante di campaña mirando e situacion cu su persona mes ta aden n’e momentonan aki, envolvi den un investigacion serio pa corupcion.

Ya Bikker a informa cu ainda e no ta tuma un decision, pero ta improbabel cu e lo subi lista tog ainda prome cu eleccion, mientras cu partido POR a kibra tur lazo cu drs Marisol Lopez Tromp, kende tampoco a informa si e lo sigui den politica of no.

Alan Howell tin un tarea grandi riba dje pa forma un partido completamente nobo y tur cos ta mustra cu actualmente su focus pa ranca voto ta draai rond di Mabon y San Nicolas, pero ta buscando pa haya candidatonan for di otro barionan tambe p’asina trata di logra algo cu ta mustra imposibel caba, esta di saca un asiento den e proceso electoral.

AWEMainta a wordo informa cu lo tin un ex integrante di partido MEP cu lo ta interesa pa bay eleccion riba lista di POR, pero cu ainda esaki no a wordo confirma y supuestamente lo tin negociacionnan tumando lugar, principalmente pa loke ta puesto riba lista.

Exigencia di varios di e personanan cu a wordo acerca pa partido POR, lo a pidi pa ta entre e prome cinco candidatonan riba lista cu ta mustra facil, pero tog no facil n’e momentonana ki.

Directiva di POR ta trahando pa hinca su programa den otro cu cual lo bishita votadornan, pero ainda no tin claridad riba esaki.

For di siman pasa tambe a circula e rumor cu Minister Chis Romero lo no subi lista di MEP mas y cu lo ta combersando cu su persona pa uni su mes na partido POR, pero AWEMainta a wordo sigura ayera tardi cu esaki no t’e caso.