Trafikante Antiano di 57 aña kondená na 10 aña di prizon

WILLEMSTAD – Korte di Den Bosch siman pasá a kondená un Antiano di 57 aña ku tabata anda den sirkulo kriminal di droga na Hulanda, na 10 aña di kastigu di prizon pa asesinato di un tipo ku el a sospechá kier a engañ’é ku un dil di droga.

Den promé instansia Corte a kondené na 12 aña di prizon i siman pasá Korte di apelashon a baha e kastigu na 10 aña.

Na momento ku Corte a trata e kaso, e tabata será kaba pa e hecho na prizon  ‘De Geerhorst’  na Sittard.

Den promé instansia Corte a absolvé di asesinato premeditá ounke e tabata kompletamente responsabel pa su aktonan e anochi ku el a mata otro hende si manera violento.

Su abogado a argumentá ku e ta menos responsabel pa su hechonan i a pidi pa baha e kastigu na 7 of 8 aña.

E kaso mes pa kual a kondené a tuma lugá dia 2 di ougustus 2018 na Hoensbroek, munisipio Heerlen, ora el a tira su viktima den barika i esaki a muri mesora.

El a skapa ku e tribunal no a kondené pa asesinato premeditá.

Relato dje kaso manera Polis a redakt’é te ku ora dos Polis tabata patruyando den sentro di Maastricht sentral a ordená nan Hoensbroek kaminda nan a yega haña un persona drumí na suela riba asera.

E viktima tabata na tinu i ora Polisnan a puntr’é ki a pasa el a kontestá ku un hende a tir’é den su barika.

Nan a yama ambulans, pero pa 12’or di anochi e viktima a muri. Outopsia a revelá ku el a haña bala meimei di su pechu riba su barika ku a kousa derame interno ku a kousa su morto.

E asesino mes a declará na Hues-Komisario ku el a tira e viktima di 49 aña, pasobra el a sospechá ku e ke ‘rip’ kokaina for di dje i a tir’é mata mesora.

“M’a kue mi arma i huntu ku su kompañero Hunter el a kana bai riba su viktima kende a bisé algu i el a tira mesora pa tené leu for di su kurpa. I einan el a muri”, asina ela deklará.

Ekspertonan a deklará ku e asesino ta poko limitá na inteligensia i no por manehá plaka.

Ademas ora e konfrontá problema e ta spanta pasobra ela denunsia su viktima na polis i awor e tabatin miedu pa represaya.

Di otro banda grabashon di kaya ta mustra ku simplemente e Antiano a topa un hende i a tir’é dirigi den barika.

E tribunal a konsiderá tambe ku komo el a presensia kon nan a tira amigunan di dje na Kòrsou, e sa masha bon kiko ta konsekuensia di uso di arma.

Asina mes el a kumpra un arma, arm’é i kana kune den e sirkuito kriminal di droga den kual e tabata move i a sobrebibi.

E Huesnan no por kompronde dikon e psikologo a bisa ku e ta menos responsabel pa su hechonan i tin mentalidat di un mucha di entre 8 pa 12 aña.

Hecho ta ku el a tira un hende mata ku e tabata konosé den e sirkuito kriminal di droga.

Su karchi di kastigu ta mustra ku el a yega di bai prezu pa trafikashon di droga, pero awor ku e tin un yiu muhé el a laga droga para.

E tabata bou di guia di Reclassering na Limburg i a konstatá ku e no ta traha i p’esei e ta bende droga pa kompletá su Bijstand.

Pa poseshon ilegal di arma e tribunal a dun’é un aña adishonal di kastigu.

Pe asesinato espontaneo a kondené na 10 aña.