AVP a tene mainta di homenahe pa Dia Internacional di Hende Muher

Partido di Pueblo Arubano (AVP), semper consciente di e papel esencial cu hende muher ta carga den tur faceta y sector di nos comunidad, no por a laga e Dia Internacional di Hende Muhe pasa sin mas. 

Esaki a sosode den forma di un mainta di reconocemento na sede di Cas di Partido na Playa. P’e ocasiona invita candidatonan femenino, ex candidato, candidatonan prospecto, campañador, activista, personal di e propio Cas di Partido y pilarnan di e partido. 

Un hende muher profesional y emprededor manera Michele Brooks, a fungi como maestro di ceremonia guiando un y tur presente dor di e programa. Na nan yegada, invitadonan a haya un bon bini di mimosa cu pasabocanan y cos dushinan crioyo den un ambiente masha elegante y agradabel cu musica en bibo di steelpan den man di e musico local, Eric Maduro.

Den su presentacion, Parlamentario Jennifer Arends-Reyes a pone e avancenan di hende muhe den perspectiva, particularmente den sector di politica. E solo hecho di por vota ta un logro riba su mes cu no hopi tempo pasa a alcansa; mescos cu e idea of decision di bay riba un lista politico tabata considera como algo cu no tabata apropia pa un hende muhe. 

Awendia, Arends-Reyes a bisa cu nos a keda lucha te cu a yega caminda nos ta awe, unda cu hende muher ta sinta na mesa y por haci enberdad un diferencia.

Mervin Wyatt Ras a menciona mas reciente un Codigo Civil cu logronan particular pa hende muher manera un zwangerschapverlof mas largo, nombramento di gobernador interino, kende ta un hende muher. Sin embargo a reconoce cu tin hopi trabou ainda pa haci riba temanan di pago igual, violencia di tur tipo contra hende muher.

Otro oradornan di e mainta tabata Nicole Godett, yiu di ex candidato Sylvia Alicia Godett (dfm), Muzaninn Wever, yiu di ex candidato y Minister di AVP, Mary Wever-Lacle (dfm) y e hoben Minorca Martis, miembro di Tienda di Ley y Plataforma Hobennan Profesional; ademas di un poesia bunita di Madelene Kelly.

Varios figura masculino di AVP tabata presente pa honra e dia y hendenan muher di e partido, manera lider mr. Mike Eman, Parlamentarionan mr. drs. Arthur Dowers, Robert Candelaria y Marlon Sneek. Eman tabatin e honor di haci entrega di un muestra di afecto na varios di e candidato y ex candidato femenino di AVP den e sala.