Ciere frontera Aruba-Venezuela prolonga cu tres luna mas

Gobierno di Aruba a prolonga e ciere di frontera entre Aruba y Venezuela cu 3 luna mas. Prome cu 10 di mei 2021, Gobierno lo dicidi si lo sigui prolonga e ciere y cu cuanto tempo mas.

Na februari 2019, Venezuela a cera e frontera entre Venezuela, Aruba y Corsou. Dia 10 di mei 2019, Venezuela kier a habri frontera, pero cu Aruba so.

N’e momento ey, Prome Minister Evelyn Wever-Croes a tuma e decision di sera e frontera entre Aruba y Venezuela. Inicialmente a sera e frontera cu un luna, y despues a prolonga e ciere cada tres luna, p’asina sigui monitorea e situacion.

Prome Minister Evelyn Wever-Croes a enfatisa cu mientras cu Aruba no ta completamente prepara p’e fluho grandi di persona riba nos pais, frontera entre Venezuela y Aruba ta keda sera.

N’e momentonan aki, Aruba ta pasando den retonan grandi y ta conta cu tur energia pa atende cu e retonan den nos pais prome. Gobierno di Aruba ta tene cuenta tambe cu e riesgonan di e corona virus cu ta haci cu Gobierno mester ta mas cauteloso.

Gobierno di Aruba, mientrastanto ta atendiendo cu e retonan cu e crisis Venezuela ta trece cu n’e. Esakinan pa Gobierno ta retonan serio. Aruba ta keda cauteloso den esaki, y lo kier mira prome cu Venezuela mes ta atende cu e crisis den nan pais.