Gabinete Wever Croes lo entrega un pais sin progreso, sin speransa y sin autonomia

Faltando seis luna pa eleccion pa un Gobierno nobo, pueblo ya ta consciente cu Gabinete Wever Croes lo entrega pueblo su pais bek, den e pio disaster hamas cu a yega di conoce y aki no ta solamente dor di e pandemia di corona virus, pero sin duda p’e falta di un vision, falta di capacidad y falta di seriedad pa realmente pone e hende na prome lugar.

Aki no mester lubida cu den pasado e actual Prome Minister Evelyn Wever Croes, a yega di cherche e lider di partido AVP, Mike Eman, den su accion di welga di hamber contra di loke el a considera abuso di marca mayor di Hulanda mientras cu awor e logra di Evelyn Wever Croes, kende no a bay den welga of no a tuma ningun, pero ningun tipo di accion di protesta, e lo entrega pueblo di Aruba na september proximo, un pais sin autonomia.

Ya caba siman pasa pueblo a haya un bon ehempel di e situacion cu tin caminda Parlamento di Aruba a trata cambionan cu mester a bin den e ley di LTU, mientras cu cinco siman prome caba Hulanda a dicidi cu e cambionan di ley aki ta oficial.

Cu otro palabra e Conseho Legislativo di pais Aruba, esta Parlamento, ta simplemente un stempel Parlamento, un institucion cu ta un adorno ya cu nan no por anula e cambio di ley aki y tin cu sinta manera un set di mucha manda y yuda Hulanda pa oficialisa legalmente e cambionan aki.

E cambionan ta permiti cu cualkier familiar di un oficial di Gobierno Hulandes cu bin traha na Aruba, por trece su casa of su partner pa Aruba sin cu nan ta rekeri permiso p’esaki y riba dje e casa of partner aki por traha unda cu e kier, cu kico cu e kier ya cu Hulanda a dicidi esaki for di dia prome di februari.

Un Arubiano cu dicidi di drenta enlace matrimonial c’un strahnero di cualkier parti di mundo, tin cu pasa den un proceso increibel prome cu despues di varios aña, e por haya permiso pa trece su casa bin biba cune na Aruba.

Na mes momento den raportahenan di CFT riba medidanan cu Gabinete Wever Croes tin cu tuma cu ta den e Landenpakket, ta wordo subraya cu Gobierno di Aruba no por ehecuta ningun proyecto sin aprobacion di Gobierno Hulandes, pues net net nada y ta na Den Haag nan lo dicidi si esaki ta bale la pena of no.

Hasta den proyectonan di traha caretera nobo, ta na Den Haag e decision aki lo cay y ta otro muestra mas di loke Gabinete Wever Croes lo entrega pueblo bek na luna di september ora cu Gobierno cambia.

Pais Aruba no a conoce progreso for di 2017 ora cu Gabinete Wever Croes a tuma mando di e pais, ningun proyecto a wordo ehecuta y tur loke a wordo haci ta un esfuerso pa caba loke Gabinete Mike Eman II a bay laga atras pa wordo ehecuta.

Un seguransa di e Gobierno cu dentro di dos luna despues di drenta gobernacion lo soluciona e situacion di dump na Parkietbos, ta mustra cu e Gobierno nobo lo haya e mesun situacion atrobe pa soluciona.

No a logra haci algo positivo pa pueblo no a logra di crea algo caminda pueblo a sali beneficia di esaki, mientras cu net lo contrario a sosode ora cu a bati pueblo sin piedad cu medida y na caminda pa porta sin salida, Gabinete Wever Croes lo bay introduci su regalo di despedida cu ta e impuesto di BTW di 12.5%. Pueblo no tin ningun tipo di speransa cu e Gobierno di Prome Minister Evelyn Wever Croes y pueblo lo sigui sinti e impacto di e mal maneho y falta di vision pa hopi tempo ya cu ainda tin mas medida pa wordo ehecuta.