Hende cu nunca a traha lo ta hayando Fase cu ta mustra riba campaña politico

Desde cu Prome Minister y lider di MEP, Evelyn Wever Croes na luna di november a anuncia inicio di campaña electoral di su partido, por a ripara cu e actual Gobierno a cuminsa cu loke ta conoci popularmente como su “afscheidbeleid.”

Entre otro mientras di un banda Prome Minister a firma acuerdo cu Gobierno di Hulanda cu e lo reduci gasto di personal y gasto di maneho, di otro banda por tuma nota di nombramentonan cu ta sigui tuma lugar, caminda ta camuflando e nomberamentonan aki como hendenan necesario den un of otro seccion nobo, di cualkier ministerio.

Tin overplaatsing tumando lugar, di promocionnan cu supuestamenta ta necesario, pero en realidad ta maniobra di un Gobierno cu ta bon na altura cu e lo no logra retene e mayoria cu e tin n’e momentonan aki den e proximo eleccion.

Tin varios forma pa hiba campaña, pero uno cu a hala atencion di redaccion di AWEMainta, ta caminda ta wordo mustra cu Minister lo a duna hende salario dor di Fase, pero aki ta trata di hendenan cu no tabata trahando, pues prome cu e pandemia caba nan tabata na cas sin traha, pero awor lo haya algo pa haci pa un di e Ministernan, cual ta pa tene e hendenan aki liga n’e partidonan den Gobierno.

Pues tin trahadornan cu a perde trabou y ainda ta luchando pa haya pago di Fase, mientras cu otronan cu no tabatin trabou awor a haya algo di haci pa motibo di campaña ta den porta y tin mester di sigura nan voto.

Ya caba tin reclamo di e forma di procede den henter e proceso aki di parti di Gobierno, caminda e otorgamento di Fase ta wordo acompaña c’un tipo di registracion automatico pa partido di e Minister cu a duna esaki, mientras cu tin otro hendenan den hopi problema mas serio cu no por haya e ayudo financiero aki y ta mirando nan situacion familiar sigui deteriora.

Hasta tin casonan caminda tin hende cu no a solicita pa Fase, pero ta haciendo trabounan chikito aki aya, pero di repiente a bin ricibi un aplicacion cu nan no a pidi, pa bin registra pa ricibi Fase cual ta otro forma di busca un sistema pa sigura voto den e proximo proceso electoral.

Ya caba ta conoci e caso di Minister Dangui Oduber, kende a dicidi di nombra cinco coordinador di su ministerio den servicio permanente na un departamento nobo cu a wordo crea na Departamento di Salubridad, cu ta encarga cu transporte di hende malo pa tratamento na hospital of nan dokter di cas.

Otro informenan ta mustra cu tin nombramentonan tumando lugar den varios departamento di Gobierno, caminda ta acorda esakinan tambe y den mayoria cas esaki tin di haber cu nombramento di un of otro miembro di famia, sea di Director of di e Minister mes, loke ta un forma bon cla di nepotismo, cual hechonan ta contra tur palabracion haci cu Hulanda y CFT.