Hende muher den posicion di liderazgo; logrando un futuro di igualdad den un mundo cu Covid-19

Den cuadro di Dia Internacional di Hende Muher, Parlamentario sra. Jennifer Arends-Reyes a hiba un discurso special dedica na nos sernan femenino. Segun sra. Arends-Reyes tin diferente tipo di liderazgo por ehempel lidernan den comunidad y liderazgo den trabou.

Nos hendenan muher en especial hopi biaha ta lidernan sin cu nan mes ta considera nan mes un. Cada logro cu un hende muher logra di reta ora cu tur hende tabata bise no, bo no lo logr’e nunca.. ta un logro pa tur ser femenino.

Hopi biaha ora cu un hende muher logra surpasa un reto, nan ta felicit’e sin sa cu tras di e logro tabatin ‘blood, sweat and tears’.. Tras di cada logro tin un lucha y sacrificio y esaki ta netamente locual cu nos ta celebrando awe.

E lucha y logro di hopi di esnan prome cu nos. Cu awe nos hendenan muher por vota, subi un lista politico, tin un trabou cu antes tabata designa pa hendenan homber so, ora cu no tabata mag di traha y ta casa.

E voz di hende muher di awe a desaroya y no t’e mesun di añanan atras. Awendia hende muher ta boga y exigi pa mas igualdad, e ta exigi p’e ta mas e norma y menos un excepcion, lucha pa yega na un puesto caminda cu nan ta na mesa y tin algo di bisa y principalmente caminda cu nan por haci un diferencia.

Desde cu nos mundo a conoce e pandemia aki, tur cos ta riba su cabes, nos normal cu nos tabata conoce mester a ser adapta pa un otro. Aunke cu e pandemia aki a trece mas inquietud y incertidumbre cun’e nos no mag bandona e lucha pa desea y realisa un Aruba mihor, un Aruba cu merece di prospera bek. Caminda cu portanan ta habri y oportunidadnan pa un y tur ta bolbe back. Pesey ta importante pa bin hunto pa comparti, pa reconoce, pa haña inspiracion di otro y asina pa hunto banda di otro, no dilanti ni patras, schouder cu schouder nos por logra reconoce un Aruba dushi tera bek, sra. Jennifer Arends-Reyes ta termina bisando.